परभणी घटना व केंद्रीय गृहमंत्र्यांकडून डॉ. बाबासाहेब आंबेडकरांविषयी अवमानकारक वक्तव्य, संगमनेरात मविआ शनिवारी करणार आंदोलन

शुक्रवार २० डिसेंबर
संगमनेर – परभणी येथील घटना व देशाचे गृहमंत्री अमित शहा यांनी सभागृहामध्ये भारतीय राज्यघटनेचे शिल्पकार, महामानव डॉ. बाबासाहेब आंबेडकर यांच्या विषयी अवमानकारक वक्तव्य केले. भाजपला आंबेडकरांविषयी असलेला राग या वक्तव्याच्या निमित्ताने समोर आला आहे. या वक्तव्यामुळे देशवासीयांच्या भावना दुखावल्या गेल्या आहेत. यामुळे संगमनेरमध्ये शनिवारी सकाळी नऊ वाजता डॉ. बाबासाहेब आंबेडकर पुतळ्याजवळ निषेध आंदोलन करण्यात येणार आहे.
काँग्रेसचे ज्येष्ठ नेते, माजी मंत्री बाळासाहेब थोरात, नाशिक पदवीधर मतदारसंघाचे माजी आमदार डॉ. सुधीर तांबे, डॉ. जयश्री थोरात यांच्या उपस्थितीमध्ये महाविकास आघाडीच्या वतीने हे निषेध आंदोलन होत असल्याची माहिती काँग्रेसचे शहराध्यक्ष सोमेश्वर दिवटे यांनी दिली आहे.
दिवटे म्हणाले, संसदेमध्ये संविधानावर चर्चा सुरू असताना केंद्रीय गृहमंत्री अमित शहा यांनी राज्यघटनेचे शिल्पकार डॉ. बाबासाहेब आंबेडकर यांच्याबद्दल अवमानकारक वक्तव्य केले. शहा यांच्या वक्तव्यामुळे भारतीयांच्या भावना दुखावल्या आहेत. महामानवाबद्दल अशा प्रकारचे वक्तव्य करणे दुर्दैवी असून यातून भाजपचा आंबेडकरांविषयी असलेला राग समोर येत आहे.
महाविकास आघाडी, पुरोगामी संघटना आणि मित्र पक्षांच्यावतीने शनिवारी सकाळी संगमनेरमध्ये हे निषेध आंदोलन होत आहे. या आंदोलनासाठी महाविकास आघाडीचे पदाधिकारी, कार्यकर्त्यांनी मोठ्या संख्येने उपस्थित राहण्याचे आवाहन करण्यात आले आहे.