संगमनेर, दि. ०५ फेब्रुवारी –
सांस्कृतिक उपक्रम हे व्यक्तिमत्व विकासाचे सर्वोत्तम साधन असून अभिव्यक्ती स्वातंत्र्याचा मुक्त आविष्कार असल्याचे प्रतिपादन संगमनेर नगर परिषदेचे मुख्याधिकारी तथा प्रशासक रामदास कोकरे यांनी केले आहे.
अखिल भारतीय मराठी नाट्य परिषदेच्या वतीने यंदाचा कला महोत्सव दिगंबर गणेश सराफ विद्यालयात आयोजित करण्यात आला होता. या कला महोत्सवात नाटिका, नाट्यछटा, रंगभरण, भेटकार्ड आदी विविध स्पर्धांमधून दोन हजार विद्यार्थ्यांचा सहभाग नोंदविला गेला.
स्पर्धेचा पारितोषिक वितरण समारंभ संगमनेर नगर परिषदेचे मुख्याधिकारी तथा प्रशासक रामदास कोकरे, बाल शिक्षण मंडळाचे अध्यक्ष डॉ. मुकुंद गाडगीळ यांच्या उपस्थितीत प्रा. डॉ. संजयकुमार दळवी यांच्या अध्यक्षतेखाली पार पडला.
यावेळी बोलताना कोकरे म्हणाले, कोणत्याही कलेची आवड सुसंस्कृत नागरिक तयार करण्यात मोलाचे योगदान देत असते. सर्वांच्या सहकार्यातून राज्यातील एक परिपूर्ण असे नाट्यगृह लवकरच कवी अनंत फंदी नाट्यगृहाच्या रुपाने संगमनेर शहराच्या वैभवात भर घालणार आहे.
डॉ. दळवी यांनी संगमनेर नाट्य परिषद शहराच्या सांस्कृतिक विकासासाठी कटिबद्ध असून नजीकच्या काळात आणखी विविध उपक्रम आयोजित करेल. विविध कला प्रकारातील कलाकार अथवा सांस्कृतिक क्षेत्राची आवड असणाऱ्या कोणत्याही व्यक्तीने सभासद होण्यासाठी आपणास असे संपर्क करण्याचे आवाहन त्यांनी केले.
नृत्य, नाट्यसंगीत यांच्या निर्मितीचे मूळ विद्यार्थ्यांना समजावून सांगत डॉ. गाडगीळ म्हणाले, संगमनेर नाट्य परिषदेच्या सहकार्यातून लवकरच काही नवीन उपक्रम आयोजित करण्यासाठी संस्था सहकार्याचा हात पुढे करेल.
स्पर्धेमध्ये संगमनेरमधील काशेश्वर विद्यालय, ज्ञानमाता विद्यालय, दिगंबर गणेश सराफ विद्यालय, बी. जी. डेरे इंग्लिश मीडियम स्कूल, पी. जे. आंबरे पाटील कन्या विद्यालय, जिजामाता इंग्लिश मीडियम स्कूल, जाजू इंग्लिश मीडियम स्कूल, शिवशंकर विद्यालय, सहकार महर्षी भाऊसाहेब थोरात विद्यालय अशा विविध शाळातील विद्यार्थ्यांनी सहभाग नोंदविला होता.
सांस्कृतिक विकास करण्यासाठी सतत प्रयत्नशील असलेल्या शिक्षकांना प्रोत्साहन म्हणून उपक्रमशील शिक्षक या सन्मानाने गौरविण्यात आले. भारती चौधर, योगिता पाटील, प्राजक्ता कासार, शैलजा गाडे यांचा तर उपक्रमशील मुख्याध्यापक म्हणून कारभारी वाकचौरे यांचा गौरव करण्यात आला.
शशांक गंधे, राजाभाऊ भांडगे, नंदा बागुल, राजू आत्तार, राधा चव्हाण, योगिता पाटील, डॉ. संजीवनी ब्राह्मणे यांनी परीक्षक म्हणून काम बघितले. तर अविनाश सूर्यवंशी यांनी कार्यक्रमाचे सूत्रसंचालन केले. यावेळी स्पर्धा प्रमुख सुभाष कानडे, धनंजय ढोले, दत्ता बटवाल, प्रशांत पेडणेकर, उपाध्यक्ष बाबासाहेब मेमाणे, कोषाध्यक्ष मोहसीन शेख, प्रमुख कार्यवाह विशाल कदम, विठ्ठल मुंगसे, द्वारकानाथ जाधव, संजय गुंजाळ, सुनील मंडलिक यांच्यासह विद्यार्थी पालक उपस्थित होते.
