बनावट नोटा प्रकरणातील आरोपीच्या कोठडी संदर्भात न्यायालयाने दिला हा निर्णय… आरोपी राहणेकडे कारवाईवेळी आढळले होते नोटांशी संबंधित साहित्य

संगमनेर, दि. २२ फेब्रुवारी –
संगमनेर शहरालगत असलेल्या आणि शहर पोलीस ठाण्याच्या हद्दीतील गुंजाळवाडी शिवारामध्ये गुरुवारी पुण्याच्या रेव्हेन्यू इंटेलिजन्सच्या पथकाने स्थानिक पोलिसांच्या मदतीने मोठी कारवाई केली होती. या कारवाईत संगमनेरमध्ये भारतीय चलनातील बनावट नोटा तयार करण्याचा प्रयत्न होत असल्याचे समोर आले होते.
कारवाईदरम्यान पोलिसांनी अटक केलेल्या आरोपी रजनीकांत राजेंद्र राहणे याला शुक्रवारी न्यायालयासमोर उभे करण्यात आले असता त्याला २५ फेब्रुवारीपर्यंत पोलीस कोठडीत ठेवण्याचे आदेश न्यायालयाने दिले असल्याची माहिती संगमनेर शहर पोलीस ठाण्याचे पोलीस निरीक्षक रवींद्र देशमुख यांनी दिली आहे. त्यामुळे पोलीस तपासात आता या प्रकरणी नेमके काय समोर येते याकडे लक्ष लागले आहे.
बनावट नोटा प्रकरणातील आरोपी रजनीकांत राहणे हा गुंजाळवाडी ग्रामपंचायतचा कर्मचारी असल्याचे देखील समोर आले आहे. दरम्यान रजनीकांत राहणे हा गुंजाळवाडी ग्रामपंचायत कर्मचारी असला तरी ग्रामपंचायतीचा या घटनेशी काही संबंध नसल्याची माहिती सरपंच अमोल गुंजाळ यांनी दिली.
गुरुवारी संगमनेरमध्ये रेव्हेन्यू इंटेलिजन्सच्या पथकाने पोलीस उपअधीक्षक डॉ. कुणाल सोनवणे, शहर पोलीस ठाण्याचे पोलीस निरीक्षक रवींद्र देशमुख, उपनिरीक्षक समीर अभंग, पोलीस कर्मचारी हरिश्चंद्र बांडे, राहुल डोके, राहुल सारबंदे यांच्या मदतीने ही मोठी कारवाई केली होती. कारवाईत पथकाने बनावट नोटा बनविण्यासाठी वापरण्यात येणारे प्रिंटर, कागद आणि चलनातील चांगल्या काही खराब बनावट नोटा ताब्यात घेतल्या असून याप्रकरणी पोलीस तपासात नेमके काय समोर येते याकडे लक्ष लागले आहे.