संगमनेर, दि. ८ मार्च – प्रतिनिधी
राजकीय दृष्ट्या प्रतिष्ठित असलेल्या आणि वर्षानुवर्ष अध्यक्ष राहिलेल्या, जिल्हा परिषदेचे माजी सदस्य भाऊसाहेब कुटे याने आर्थिक गैरव्यवहार करत वाट लावलेल्या दूधगंगा नागरी सहकारी पतसंस्थेला गैरव्यवहाराच्या दृष्टचक्रातून सावरण्यासाठी आता नव्या संचालकांची टीम मैदानात उतरली आहे. संस्थेच्या संचालक मंडळाचे निवडणूक बिनविरोध पार पडली आहे.
संगमनेरच्या सहकारातील अग्रगण्य असलेल्या दूधगंगा नागरी सहकारी पतसंस्थेत चेअरमन भाऊसाहेब कुटे याने संस्थेतील काही जणांना हाताशी धरत मोठा आर्थिक गैरव्यवहार केला. तब्बल ८१ कोटी रुपयांच्या आर्थिक गैरव्यवहार प्रकरणी चेअरमन भाऊसाहेब कुटे, संस्थेचा व्यवस्थापक भाऊसाहेब गुंजाळ यांच्यासह तब्बल २१ जणांविरोधात संगमनेर शहर पोलीस ठाण्यात लेखा परीक्षकांनी दिलेल्या फिर्यादीवरून गुन्हा दाखल आहे.
यातील मुख्य आरोपी असलेला भाऊसाहेब कुटे आणि व्यवस्थापक भाऊसाहेब गुंजाळ हे दोघे अद्यापही तुरुंगात असून अन्य काही आरोपींना न्यायालयाने, उच्च न्यायालयाने व सर्वोच्च न्यायालयाने दिलासा दिल्याने ते जामीनावर बाहेर आहे. मोठ्या आर्थिक गैरव्यवहारानंतर अनेक ठेवीदार आपल्या ठेवी परत मिळण्यासाठी झगडत आहे.
अशातच दूधगंगा नागरी सहकारी पतसंस्थेच्या १७ जागांसाठी निवडणुकीचा कार्यक्रम जाहीर करण्यात आला होता. ६ मार्चपर्यंत उमेदवारी अर्ज मागे घेण्याचा अखेरचा दिवस होता. तर १६ मार्चला प्रत्यक्ष निवडणूक होणार होती. मात्र तत्पूर्वीच उमेदवारी अर्ज मागे घेण्याच्या अखेरच्या दिवशी अनुसूचित जाती जमाती प्रवर्ग प्रतिनिधीसाठी कोणीही अर्ज दाखल केला नसल्याने ही जागा रिक्त आहे. या एकमेव जागेचा अपवाद वगळता उर्वरित १६ जागांवर संस्थेच्या संचालक मंडळाची निवडणूक एक जागा वगळता बिनविरोध झाली आहे. निवडणूक निर्णय अधिकारी तथा संगमनेरचे उपनिबंधक संतोष कोरे यांनी या संदर्भात माहिती दिली.
नव्या संचालक मंडळात सर्व संचालक नवीन असल्याने आता ते संस्थेला सावरण्यासाठी नेमके काय प्रयत्न करतात, तसेच संस्थेतील गैरव्यवहारा संदर्भात नेमके काय पावले टाकतात, हे येत्या काही दिवसात समोर येईल.
असे आहे बिनविरोध झालेले नवे संचालक मंडळ…
सर्वसाधारण प्रतिनिधी म्हणून उत्तमराव कृष्णराव गुंजाळ, प्रभाकर पांडुरंग राहणे, लक्ष्मण नाना जोंधळे, अशोक सुखदेव गुंजाळ, भाऊसाहेब सावित्रा राऊत, रामनाथ बाळाजी कुटे, सुभाष सखाराम कुटे, खंडू बाबाजी सातपुते, विलास जगन्नाथ सातपुते, उत्तम गणपत पवार, अरुण रामचंद्र सातपुते, भाऊसाहेब सोमनाथ अरगडे
महिला राखीव प्रतिनिधी – मंदा रंगनाथ माने व संगीता दत्तू सातपुते
इतर मागासवर्गीय प्रतिनिधी – कैलास रामभाऊ घोडेकर
भटक्या जाती / जमाती / वि.मा.प्र. प्रतिनिधी – अण्णासाहेब रामनाथ गोफणे
