संगमनेर, दि. १६ मार्च – प्रतिनिधी
छात्र भारतीच्या पदाधिकाऱ्यांना मारहाण करणाऱ्या महायुतीच्या पदाधिकारी कार्यकर्त्यांवर गुन्हे दाखल झाले नाही तर राज्यभरात तीव्र आंदोलन छेडण्याचा इशारा माजी आमदार कपिल पाटील यांनी दिला आहे.
मंत्री नितेश राणे यांची मंत्रिमंडळातून हकालपट्टी करा या मागणीचे निवेदन पालकमंत्री राधाकृष्ण विखे यांना देण्यासाठी गेलेल्या छात्र भारती संघटनेच्या राज्य कार्याध्यक्ष अनिकेत घुले आणि त्याच्या सहकाऱ्यांना झालेल्या मारहाणीच्या निषेधार्थ राज्यभरातील छात्र भारतीच्या पदाधिकारी कार्यकर्त्यांनी शनिवारी पोलीस उपाधीक्षकांच्या कार्यालयावर संगमनेरमध्ये मोर्चा काढला होता.
शनिवारी पालकमंत्री राधाकृष्ण विखे पाटील आढावा बैठकीसाठी संगमनेर नगर परिषदेत आले होते त्यावेळी मारहाणीची घटना घडली. मारहाण झालेल्या कार्यकर्त्यांची तक्रार देखील अद्यापपर्यंत पोलिसांनी नोंदवलेली नाही. तसेच मारहाण करणाऱ्या आरोपींना अटक केलेली नाही. त्यामुळे मारहाण करणाऱ्या तरुणांविरुद्ध गुन्हा दाखल करून त्यांना अटक करावी या मागणीसाठी छात्र भारती संघटनेच्यावतीने भास्करराव दुर्वे स्मारक भावनापासून मोर्चा काढण्यात आला.
घोषणाबाजी करीत हा मोर्चा प्रांताधिकारी कार्यालयावर आला. या ठिकाणी निषेध सभा घेण्यात आली. याप्रसंगी माजी आमदार डॉ. सुधीर तांबे, ॲड. रंजना गवांदे, हिरालाल पगडाल, डॉ. अजित नवले, उत्कर्षा रुपवते यांच्यासह विविध मान्यवर व कार्यकर्ते मोठ्या संख्येने उपस्थित होते.
कपिल पाटील म्हणाले, या जिल्ह्याला अहिल्यानगरचे नाव देण्यात आलेले आहे. अहिल्याबाईंच्या नावाने असलेल्या या जिल्ह्यामध्ये बीडसारखे वातावरण होऊ पाहत आहे. पालकमंत्र्यांनी जिल्ह्याची प्रतिष्ठा, परंपरा राखली पाहिजे. महाराष्ट्र हा फुले, आंबेडकरांचा आहे. फुले आंबेडकरांनी आखून दिलेली समतेची, एकतेची, लक्ष्मणरेषा नितेश राणे सारखे मंत्री ओलांडत असेल व अशा मंत्र्यांविरुद्ध आवाज उठवणाऱ्या अनिकेत घुले सारख्या कार्यकर्त्याला मारहाण होत असेल तर हा अक्षम्य गुन्हा आहे. पोलिसांनी गुन्हेगाराला त्वरित ताब्यात घेत गुन्हा दाखल केला नाही तर मोठा मोर्चा काढावा लागेल. दोन दिवस वाट पाहू अन्यथा मोठे आंदोलन करण्यात येईल, असा इशारा दिला.
यावेळी माजी आमदार डॉ. सुधीर तांबे, रंजना गवांदे, डॉ. अजित नवले, दत्ता ढगे, उत्कर्षा रूपवते आदींनी आपल्या भाषणातून या मारहाणीचा निषेध करत मारहाण करणाऱ्यांना त्वरित अटक करावी अशी मागणी केली.
