एकत्रित उत्सव साजरा करण्याची परंपरा, मात्र यावेळी वेगळे चित्र बघावयास मिळाले : माजी मंत्री बाळासाहेब थोरात

संगमनेर, दि. १७ मार्च – प्रतिनिधी
संगमनेरमध्ये शिवजयंती उत्सव समितीच्या माध्यमातून सर्वांनी एकत्र येऊन छत्रपती शिवाजी महाराजांची जयंती साजरी करण्याची अनेक वर्षांची परंपरा आहे. सर्वांनी मतभेद विसरून एकत्र जयंती करावी ही आपली पद्धत राहिली. मात्र यावेळेस वेगळे चित्र पहावयास मिळत आहे, असे प्रतिपादन माजी मंत्री बाळासाहेब थोरात यांनी केले.
रविवारी रात्री संगमनेर बस स्थानकांच्या प्रवेशद्वारापाशी स्वाभिमानी संगमनेर शहर व तालुका शिवजयंती उत्सव समितीच्या वतीने छत्रपती शिवाजी महाराजांच्या मंदिराचा देखावा करण्यात आला आहे. या देखाव्याचे उद्घाटन माजी मंत्री बाळासाहेब थोरात यांच्या हस्ते करण्यात आले. यावेळी तांबे बोलत होते. प्रारंभी छत्रपती शिवाजी महाराज यांच्या पुतळ्याला अभिवादन करत देखाव्यासाठी आलेल्या माजी मंत्री थोरात, आमदार तांबे यांचे ढोल ताशांच्या गजरात स्वागत करण्यात आले.
थोरात, तांबे यांच्यासह माजी आमदार डॉ. सुधीर तांबे, माजी नगराध्यक्ष दुर्गाताई तांबे, कांचनताई थोरात, डॉ. जयश्री थोरात, डॉ. मैथिली तांबे, सोमेश्वर दिवटे आदींसह पदाधिकारी, कार्यकर्ते मोठ्या संख्येने उपस्थित होते.
थोरात म्हणाले, छत्रपती शिवाजी महाराजांनी समाजातील अठरापगड जातीतील लोकांना बरोबर घेऊन स्वराज्य उभे केले. छत्रपती शिवाजी महाराज हे सदैव आपले आदर्श आहेत. महाराजांची युद्धनीती, जनकल्याणाची कामे, कायदा व सुव्यवस्था, लोकशाही, आदर्श राज्य व्यवस्था याबाबत संपूर्ण जगासाठी ते आदर्शवत आहे. आदर्श राज्य, स्वराज्य व आदर्श समाज निर्माण करण्याचा छत्रपती शिवाजी महाराज, महात्मा फुले, शाहू महाराज, डॉ. बाबासाहेब आंबेडकर यांच्यासह विविध संत समाज सुधारकांचा विचार घेऊन आपल्याला पुढे जायचे आहे.
संगमनेर बस स्थानकाच्या प्रवेशद्वारालगत छत्रपती शिवाजी महाराजांच्या मंदिराचा देखावा स्थानिक कलाकार सुनील मादास यांच्या संकल्पनेतून तयार करण्यात आला असून त्यांचा देखील यावेळी थोरात यांच्या हस्ते सत्कार करण्यात आला.