कोल्हापूर, दि. १८ मार्च –
छत्रपती शिवाजी महाराज यांच्याविषयी अपमानकारक वक्तव्य केल्याप्रकरणी प्रशांत कोरटकर याचा अंतरिम जामीन अर्ज कोल्हापूर सत्र न्यायालयाने फेटाळला आहे. या निर्णयामुळे कोरटकरच्या अडचणींमध्ये वाढ झाली असून, त्याला कधीही अटक होऊ शकते, अशी शक्यता वर्तवली जात आहे.
या प्रकरणाची सुनावणी १७ मार्च रोजी पूर्ण झाली होती, तर निकाल १८ मार्च रोजी जाहीर करण्यात आला. कोल्हापूर सत्र न्यायालयाने सरकारी वकील आणि फिर्यादीच्या वकिलांची बाजू मान्य करत कोरटकरच्या अंतरिम जामीन अर्जाला नकार दिला आहे.
काही दिवसांपूर्वी प्रशांत कोरटकरने इतिहास संशोधक इंद्रजित सावंत यांना फोनवरून जीवे मारण्याची धमकी दिल्याचा आरोप आहे. यासोबतच, त्याने छत्रपती शिवाजी महाराज आणि छत्रपती संभाजी महाराज यांच्याबद्दल अपमानजनक वक्तव्य केल्याचा दावाही करण्यात आला आहे.
या घटनेनंतर कोरटकरविरुद्ध गुन्हा दाखल झाला होता. त्याने अंतरिम जामिनासाठी न्यायालयात धाव घेतली होती, परंतु न्यायालयाने त्याचा अर्ज नामंजूर केला आहे. आता त्याला अटक होण्याची शक्यता बळावली आहे.
१७ मार्च रोजी झालेल्या सुनावणीत कोरटकरच्या जामिनावर जोरदार युक्तिवाद झाला. फिर्यादी इंद्रजित सावंत यांची बाजू वकील असीम सरोदे यांनी मांडली, तर सरकारी वकील विवेक शुक्ल यांनीही प्रभावी युक्तिवाद केला. “स्वातंत्र्याचा अर्थ स्वैराचार नव्हे. गुन्हा दाखल होताच कोरटकर ‘तो माझा आवाज नाही’ म्हणत फरार झाला,” असे त्यांनी न्यायालयाच्या निदर्शनास आणले.
दुसरीकडे, आरोपी प्रशांत कोरटकरची बाजू वकील सौरभ घाग यांनी मांडली होती. तरीही न्यायालयाने जामीन अर्ज फेटाळला आहे.
