कोल्हापूर, दि. ३० मार्च –
छत्रपती शिवाजी महाराज यांच्याबद्दल आक्षेपार्ह वक्तव्य करणारा आणि इतिहास अभ्यासक इंद्रजित सावंत यांना धमकी देणारा प्रशांत कोरटकर सध्या चर्चेत आहे. त्याला रविवारी न्यायालयाने १४ दिवसांची न्यायालयीन कोठडी सुनावली आहे. आता प्रशांत कोरटकर याने तातडीने जामिनासाठी न्यायालयात अर्ज केला असून यावर १ एप्रिलला सुनावणी होणार आहे. न्यायालयाचा निर्णय येईपर्यंत प्रशांत कोरटकरचा कोठडीतील मुक्काम वाढणार असून त्यानंतर जामीन मिळणार की कोरटकर न्यायालयीन कोठडीत मुक्कामाला राहणार? याकडे सर्वांचे लक्ष लागले आहे.
तेलंगणातून झाली अटक… काही दिवसांपूर्वी प्रशांत कोरटकरला तेलंगणातून अटक करण्यात आली. अटक केल्यानंतर मंगळवारी (२५ मार्च) कोल्हापूर जिल्हा सत्र न्यायालयाने प्रशांत कोरटकरला तीन दिवसांची पोलीस कोठडी सुनावली होती. यानंतर २८ मार्चला कोरटकरला पुन्हा एकदा कोर्टात हजर केले असता त्याला दोन दिवसांची पोलीस कोठडी सुनावण्यात आली होती. आज पुन्हा प्रशांत कोरटकरला न्यायालयात हजर करण्यात आले. यावेळी न्यायालयाने प्रशांत कोरटकरला १४ दिवसांची न्यायालयीन कोठडी सुनावली आहे.
जामीनासाठी अर्ज… यानंतर प्रशांत कोरटकर तातडीने जामिनासाठी कोर्टात अर्ज दाखल करणार आहे. जामिनासाठी अर्ज केल्यानंतर या प्रकरणात सुनावणी होणार असून प्रशांत कोरटकरला जामीन मिळणार की न्यायालयीन कोठडीत रवानगी होणार? हे पाहणे महत्त्वाचे ठरणार आहे.
कोरटकरवर न्यायालयात हल्ला… दरम्यान, छत्रपती शिवाजी महाराजांची बदनामी करणाऱ्या प्रशांत कोरटकरला अटक करण्यासाठी पोलिसांना जवळपास महिन्याभराचा कालावधी लागला होता. कोरटकरला तेलंगणातून अटक करण्यात आली. शुक्रवारी कोरटकरला न्यायालयात हजर करण्यात आले होते. न्यायालयात ४० ते ४५ मिनिटं युक्तिवाद झाला. त्यानंतर कोरटकर न्यायालयातच न्यायमूर्तींच्या आदेशाची वाट पाहत थांबला होता. न्यायाधीशांनी त्याची पोलीस कोठडी दोन दिवसांनी वाढवली. यानंतर पोलीस त्याला घेऊन गेले. न्यायालयाच्या मागच्या दाराने त्याला बाहेर नेले जात होते. त्यावेळी वकिल अमितकुमार भोसले यांनी कोरटकर दिसताच त्यांनी त्याला हाक मारली. शिवाजी महाराजांची बदनामी करतोस का? असा सवाल विचारत भोसले कोरटकरवर धावून गेले. त्यांनी कोरटकरवर झडप घातली. यानंतर पोलिसांनी अमितकुमार भोसले यांना दूर केले होते.
