संगमनेर, दि. २ एप्रिल – प्रतिनिधी
सहकाराचे मोठे वलय लाभलेल्या संगमनेर तालुक्यात पतसंस्थांचे जाळे मोठ्या प्रमाणात भक्कमपणे विणले गेले आहे. या पतसंस्थांच्या माध्यमातून कोट्यावधी रुपयांची उलाढाल तालुक्यात होत असते. घुलेवाडी येथील स्वातंत्र्य सैनिक भास्करराव दुर्वे नाना ग्रामीण बिगर शेती सहकारी पतसंस्थेने मावळत्या आर्थिक वर्षात मोठे यश मिळविले आहे. संस्थेने आर्थिक वर्षांमध्ये १३ कोटी १२ लाख ६२५ रुपयांची उलाढाल करत ९ लाख ११ हजार रुपयांचा नफा मिळवला असल्याची माहिती देण्यात आली आहे.
मावळत्या आर्थिक वर्ष अखेर पतसंस्थेकडे १० कोटी ४८ लाख ४० हजार ३०३ रुपयांच्या ठेवी असून, ८ कोटी २३ लाख ५८ हजार ७०० रुपयांचे कर्ज वाटप करण्यात आले आहे. तसेच संस्थेकडे इतर निधी म्हणून १ कोटी ३५ लाख २५ हजार ६०५ रुपये, तर भाग भांडवल ५९ लाख ९२ हजार ५०० रुपये आहे, यामुळे संस्थेची आर्थिक स्थिती भक्कम असल्याचे दिसते.
पतसंस्थेच्या माध्यमातून ३ कोटी ५६ लाख ८५ हजार ६१२ रुपयांची गुंतवणूक करण्यात आली आहे. आर्थिक वर्षात संस्थेने उत्तम कामगिरी करत सव्वा कोटींपेक्षा जास्त ठेवी वाढवल्या आहेत. घुलेवाडी परिसर, संगमनेर शहर आणि ग्रामीण भागातील अनेक गावातील लोकांचा दुर्वे नाना पतसंस्थेवर विश्वास आहे. संगमनेर तालुक्यातील अनेक गावातील नागरिक या संस्थेचे सभासद आहेत.
