संगमनेर, दि. ४ एप्रिल –
जिल्हा मध्यवर्ती सहकारी बँक आणि संगमनेर मर्चंट सहकारी बँकेवर सेवक संचालकपदाची नियुक्ती ३० दिवसांत कायदेशीर प्रक्रियेनुसार पूर्ण करण्याचे आदेश उच्च न्यायालयाच्या औरंगाबाद खंडपीठाने दिले आहेत.
जिल्हा बँक कर्मचारी संघटनेचे कार्यकारी अध्यक्ष आणि याचिकाकर्ते धनंजय भंडारे यांनी या संदर्भात माहिती दिली. उच्च न्यायालयाने नाशिक विभागाच्या सहकार खात्याच्या सहनिबंधकांना हे आदेश दिले आहेत.
संघटनेने जिल्हा सहकारी बँकेवर विद्या अजय तन्वर आणि श्रीमंत घुले यांची, तर संगमनेर मर्चंट सहकारी बँकेवर वाघोबा शेलार आणि तुकाराम सांगळे यांची सेवक संचालक म्हणून नियुक्ती केली होती. मात्र, संबंधित बँकांनी ही नियुक्ती स्वीकारण्यास टाळाटाळ केली होती. या विरोधात संघटनेने प्रथम नाशिक विभागीय सहनिबंधकांकडे आणि त्यानंतर उच्च न्यायालयात धाव घेतली होती.
उच्च न्यायालयाने या याचिकेवर सुनावणी करताना सहनिबंधकांना जिल्हा बँकेवर विद्या तन्वर व श्रीमंत घुले आणि संगमनेर मर्चंट बँकेवर वाघोबा शेलार व तुकाराम सांगळे यांच्या नियुक्तीची कायदेशीर प्रक्रिया निकालाच्या तारखेपासून ३० दिवसांच्या आत पूर्ण करून त्यांना संबंधित बँकेच्या सेवक संचालकपदी नियुक्त करण्याचे निर्देश दिले आहेत. तसेच, याबद्दल दोन्ही बँकांना कळवण्याचेही आदेश न्यायालयाने दिले आहेत, असे भंडारे यांनी सांगितले.
या प्रकरणी संघटनेच्या वतीने वकील शरद नातू यांनी उच्च न्यायालयात बाजू मांडली. कर्मचारी हितासाठी संघटना नेहमीच प्रयत्नशील राहील, असे आश्वासन धनंजय भंडारे यांनी दिले आहे.
