प्रशांत कोरटकरच्या जामीन अर्जावर आज निर्णय

कोल्हापूर, दि.९ एप्रिल –
राजमाता जिजाऊ, छत्रपती शिवाजी महाराज आणि छत्रपती संभाजी महाराज यांच्याबद्दल अपमानास्पद टिप्पणी करणारा प्रशांत कोरटकर याच्या जामीन अर्जावर आज, ९ एप्रिल रोजी निर्णय येणार आहे. न्यायाधीश डी. व्ही. कश्यप यांनी दोन्ही बाजूंचे युक्तिवाद ऐकून घेतल्यानंतर निर्णय राखून ठेवला होता. १२ एप्रिल रोजी कोरटकरची न्यायालयीन कोठडी संपणार असून, त्यापूर्वी न्यायालय त्याला जामीन देणार का, याकडे आता लक्ष लागले आहे.
इतिहास अभ्यासक इंद्रजित सावंत यांच्यावतीने वकील असीम सरोदे यांनी न्यायालयात बाजू मांडताना सांगितले होते की, कोरटकरने पहिल्यांदा कॉल केल्यावर सावंत यांनी तो कट केला. दुसऱ्यांदा कॉल केल्यावर वेगळी भाषा वापरल्याने सावंत यांनी संभाषण रेकॉर्ड केले. मात्र, कोरटकरने पोलिसांना मोबाईल सुपूर्द करताना त्यातील डेटा डिलीट केला, जो महत्त्वाचा पुरावा होता. त्याने स्वतःच्या जीवाला धोका असल्याचे सांगून पोलीस सुरक्षा मागितली आणि सुरक्षा असतानाही तो पळून गेला.
ॲड. सरोदे यांनी पुढे युक्तिवाद केला की, कोरटकरने धमकी देण्यामागचे कारण स्पष्ट केलेले नाही. बाहेर त्याच्यावर हल्ले करण्याचा प्रयत्न झाला आहे, त्याला चप्पल दाखवण्यात आली, एका वकिलानेही हल्ला केला. सध्या कोरटकर तुरुंगात सुरक्षित आहे, त्यामुळे त्याचा जामीन अर्ज मंजूर करू नये. या युक्तिवादावर कोरटकरचे वकील सौरभ घाग यांनी जोरदार आक्षेप घेतला. न्यायालयाने दोन्ही बाजूंचे म्हणणे ऐकून घेतल्यानंतर जामीन अर्जावरील निर्णयाची तारीख ९ एप्रिल निश्चित केली.
ॲड. सरोदे यांनी असाही प्रश्न उपस्थित केला की, महापुरुषांबद्दल अपमानास्पद बोलल्यानंतर कोरटकर महिनाभर फरार होता. तपासात त्याला प्रशिक पडवेकर याने दीड लाख रुपयांची मदत केल्याचे निष्पन्न झाले आहे. त्यामुळे कोरटकरला मदत करणाऱ्या साथीदारांचा तपास होणे आवश्यक आहे. तपास अपूर्ण असताना जामिनासाठी इतकी घाई का केली जात आहे, असा सवालही त्यांनी विचारला.