वादग्रस्त वक्तव्य प्रकरणी प्रशांत कोरटकरच्या जामीन अर्जाबाबत न्यायालयाचा निर्णय आला…

कोल्हापूर, दि. ९ एप्रिल –
छत्रपती शिवाजी महाराज यांच्याबद्दल कथित वादग्रस्त विधान केल्याप्रकरणी अटकेत असलेल्या प्रशांत कोरटकर याला कोल्हापूर न्यायालयाने आज जामीन मंजूर केला.
काही दिवसांपूर्वी प्रशांत कोरटकर याने कोल्हापूरमधील इतिहास अभ्यासक इंद्रजित सावंत यांना दूरध्वनीवरून धमकी दिली होती. याच संभाषणात त्याने छत्रपती शिवाजी महाराजांविषयी आक्षेपार्ह टिप्पणी केल्याचा आरोप आहे. याप्रकरणी सावंत यांनी पोलिसात तक्रार दाखल केली होती, त्यानंतर कोरटकरला अटक करण्यात आली होती.
यापूर्वी न्यायालयाने कोरटकरला पाच दिवसांची पोलीस कोठडी आणि त्यानंतर १४ दिवसांची न्यायालयीन कोठडी सुनावली होती. त्याने दाखल केलेला जामीन अर्ज यापूर्वी फेटाळण्यात आला होता, त्यामुळे त्याचा कळंबा कारागृहातील मुक्काम वाढला होता.
आज झालेल्या सुनावणीत न्यायालयाने त्याला जामीन मंजूर केला. वकील असीम सरोदे यांनी सांगितले की, ज्या कलमांअंतर्गत गुन्हा दाखल करण्यात आला आहे, त्यात तीन वर्षांपेक्षा जास्त शिक्षेची तरतूद नाही, हा युक्तिवाद न्यायालयात ग्राह्य धरण्यात आला. दरम्यान, इंद्रजित सावंत यांनी प्रशांत कोरटकरला अब्रुनुकसानीची कायदेशीर नोटीस पाठवली आहे. ॲड. असीम सरोदे यांच्यामार्फत कारागृहाच्या पत्त्यावर ही नोटीस पाठवण्यात आली आहे.
न्यायालयात दाखल केलेल्या जामीन अर्जात प्रशांत कोरटकरने इंद्रजित सावंत यांच्यावर चुकीचे आरोप केले होते. सावंत यांनी छत्रपती शिवाजी महाराज आणि छत्रपती संभाजी महाराज यांचा अनेकदा अपमान केल्याचा आणि त्यांच्यावर सामाजिक तेढ निर्माण करण्याचे गुन्हे दाखल होऊन त्यांना अटक झाली होती, अशी खोटी माहिती अर्जात नमूद केली होती. यावर इंद्रजित सावंत यांनी आक्षेप घेतल्यानंतर प्रशांत कोरटकरच्या वकिलांनी न्यायालयात संबंधित परिच्छेद रद्द करत असल्याचे लेखी स्वरूपात सांगितले.