अल्पवयीन मुलीवरील अत्याचारातील आरोपी डॉक्टरला फाशी देण्याची विहिंप, दुर्गावाहिनीची मागणी

संगमनेर, दि. ११ एप्रिल – प्रतिनिधी
संगमनेर शहरात एका डॉक्टरने अल्पवयीन मुलीवर अत्याचार केल्याची धक्कादायक घटना उघडकीस आली आहे. याप्रकरणी पोलिसांनी तातडीने कारवाई करत आरोपी डॉक्टर अमोल कर्पे याला अटक केली आहे. त्याच्याविरुद्ध लैंगिक अपराधांपासून बालकांचे संरक्षण (पॉक्सो) कायद्यान्वये गुन्हा दाखल करण्यात आला असून, न्यायालयाने त्याला १० दिवसांची पोलीस कोठडी सुनावली आहे.
पीडित मुलीने दिलेल्या तक्रारीनुसार, ती आरोपी डॉक्टरकडे उपचारासाठी गेली असताना हा घृणास्पद प्रकार घडला. घटनेची माहिती मिळताच पोलिसांनी त्वरित पाऊले उचलत आरोपीला नाशिकमधून बेड्या ठोकल्या. या घटनेमुळे संगमनेरच्या वैद्यकीय क्षेत्राची प्रतिमा मलिन झाली असून, समाजात तीव्र संताप व्यक्त होत आहे.विश्व हिंदू परिषद दुर्गावाहिनी या संघटनेने या घटनेचा तीव्र निषेध नोंदवला आहे. संघटनेने आरोपी डॉ. अमोल कर्पे याचे वैद्यकीय लायसन्स आणि त्याच्या रुग्णालयाचे परवाने तत्काळ रद्द करण्याची मागणी केली आहे. यासोबतच, आरोपीला कठोर शिक्षा, म्हणजेच फाशीची शिक्षा देण्याची मागणी दुर्गावाहिनीने केली आहे.
प्राप्त माहितीनुसार, आरोपी डॉक्टरचा यापूर्वीचा इतिहासही संशयास्पद आहे. त्याच्यावर यापूर्वीही अशाच प्रकारचे गंभीर आरोप झाले होते, मात्र ते तक्रारींपर्यंत पोहोचले नव्हते. या वेळी मात्र, पीडितेने हिंमत दाखवत तक्रार दाखल केल्याने हे प्रकरण उघडकीस आले असून, आरोपीला आता न्यायालयीन कारवाईला सामोरे जावे लागत आहे.
या घटनेने केवळ संगमनेरमध्येच नव्हे, तर संपूर्ण जिल्ह्यात आणि राज्यात खळबळ उडाली आहे. सामाजिक कार्यकर्ते आणि राजकीय नेत्यांनीही या घटनेवर तीव्र प्रतिक्रिया व्यक्त केल्या आहेत. आरोपी डॉक्टरला कठोर शिक्षा देण्याची आणि वैद्यकीय क्षेत्रातील अशा अनैतिक व्यक्तींवर कडक नियंत्रण ठेवण्याची मागणी जोर धरू लागली आहे.
दरम्यान, या प्रकरणाचा पोलीस कसून तपास करत असून, पीडित मुलीला न्याय मिळवून देण्यासाठी सर्व आवश्यक पाऊले उचलली जात आहेत. काल, १० एप्रिल रोजी विश्व हिंदू परिषद, बजरंग दल आणि दुर्गावाहिनीच्या संगमनेर शाखेच्या वतीने याबाबत निवेदन देण्यात आले. यावेळी दुर्गावाहिनी संगमनेर शहर संयोजिका ॲड. सोनाली बोटवे, जिल्हा सहसंयोजिका शामल बेल्हेकर, दिपाली वाव्हळ आणि सौम्या बेल्हेकर उपस्थित होत्या.