नगर अर्बन बँकेच्या संगमनेर, बेलापूरसह चार शाखांना टाळे; खर्च कपातीसाठी निर्णय

महाराष्ट्र संवाद न्यूज – अहिल्यानगर
रिझर्व्ह बँकेने व्यवसाय परवाना रद्द केल्यानंतर अवसायनात असलेल्या नगर अर्बन को-ऑपरेटिव्ह बँकेच्या आणखी चार शाखा येत्या २३ मे पासून बंद होणार आहेत. बँकेचा दैनंदिन खर्च कमी करण्याच्या उद्देशाने हा निर्णय घेण्यात आला असल्याची माहिती अवसायक गणेश गायकवाड यांनी दिली आहे.
बंद होणाऱ्या शाखांमध्ये संगमनेर, बेलापूर, नगर मार्केट यार्ड आणि केडगाव (इंडस्ट्रियल इस्टेट) यांचा समावेश आहे. या सर्व शाखांचे कामकाज आता नगरच्या मुख्य शाखेतून चालणार आहे. बँकेने या शाखांमधील खातेदार आणि लॉकरधारकांना त्यांच्या लॉकरमधील वस्तू काढून घेऊन लॉकरच्या चाव्या बँक प्रशासनाकडे जमा करण्याचे आवाहन केले आहे. यापूर्वी बँकेने काही शाखा बंद केल्या आहेत.
अवसायक गायकवाड यांनी स्पष्ट केले आहे की, बँकेतील सर्व ठेवीदारांचे पैसे सुरक्षित आहेत. डीआयसीजीसी आणि केंद्रीय निबंधक, नवी दिल्ली यांच्या नियमांनुसार ठेवीदारांना त्यांचे पैसे परत करण्याची प्रक्रिया सुरू आहे. सर्व ठेवीदारांनी त्यांचे केवायसी अद्ययावत करून त्यांचे क्लेम फॉर्म जवळच्या शाखेत त्वरित जमा करावेत, असे आवाहन त्यांनी केले आहे.