जिल्हाधिकारी कार्यालयात मुख्यमंत्री सहाय्यता निधी कक्ष, पालकमंत्र्यांच्या हस्ते उद्घाटन… गरजू रुग्णांना मुख्यमंत्री सहाय्यता निधीचा जास्तीत जास्त लाभ द्या – पालकमंत्री राधाकृष्ण विखे पाटील

अहिल्यानगर, दि. १ – मुख्यमंत्री सचिवालयाच्या मुख्यमंत्री सहाय्यता निधी व धर्मदाय रुग्णालय मदत केंद्राचे जलसंपदा मंत्री तथा पालकमंत्री राधाकृष्ण विखे पाटील यांच्या हस्ते जिल्हाधिकारी कार्यालयात आज उद्घाटन करण्यात आले. मुख्यमंत्री सहाय्यता निधीचा जास्तीत जास्त गरजू रुग्णांना लाभ देण्यासाठी या योजनेच्या माध्यमातून देण्यात येणाऱ्या सोयी-सुविधा व उपचारांची व्यापक प्रसिद्धी करण्यात यावी, अशा सूचना यावेळी पालकमंत्र्यांनी दिल्या.
याप्रसंगी जिल्हाधिकारी डॉ. पंकज आशिया, जिल्हा परिषदेचे मुख्य कार्यकारी अधिकारी आशिष येरेकर, जिल्हा शल्यचिकित्सक डॉ. नागराज चव्हाण, जिल्हा आरोग्य अधिकारी डॉ. बापूराव नागरगोजे, जिल्हा कक्ष अधिकारी तथा वैद्यकीय अधिकारी डॉ. नीळकंठ ठाकरे आदी उपस्थित होते.
पालकमंत्री विखे पाटील म्हणाले, “शासनाच्या महात्मा ज्योतिबा फुले जनआरोग्य योजना, आयुष्यमान कार्ड, धर्मादाय रुग्णालय योजनांचा लाभ न मिळालेल्या गरजू रुग्णांना मुख्यमंत्री सहाय्यता निधीच्या माध्यमातून प्राधान्याने लाभ देण्यात यावा. या योजनेची माहिती जिल्ह्यातील सर्व आरोग्य केंद्र व रुग्णालयांमध्ये भित्तिपत्रकांच्या स्वरूपात प्रसिद्ध करण्यात यावी.”
मुख्यमंत्री सहाय्यता निधी कक्षामार्फत महात्मा ज्योतिबा फुले जनआरोग्य योजनेअंतर्गत लाभ घेण्यास पात्र असलेल्या रुग्णांना संबंधित योजनेच्या जिल्हा समन्वयकांद्वारे संलग्नित (Empanelled) रुग्णालयात दाखल करण्याबाबत कळविण्यात येणार आहे. धर्मादाय रुग्णालयात दाखल झालेल्या रुग्णांच्या बाबतीत, जिल्हा धर्मादाय उपायुक्त कार्यालयातून जिल्ह्यातील उपलब्ध धर्मादाय संस्थांची माहिती घेऊन त्यानुसार रुग्णास रुग्णालयात दाखल करण्याबाबत व सवलतीच्या दराने अथवा मोफत उपचार उपलब्ध करून देण्याकरिता लेखी स्वरूपात कळविण्यात येणार आहे.
राष्ट्रीय बाल स्वास्थ्य कार्यक्रम (RBSK) अंतर्गत, ० ते १८ वर्षे वयापर्यंतच्या रुग्णांकरिता योजनेतील विहित व्याधी, विकार अनुरूप मोफत उपचार केले जातात. पात्र रुग्णांना जिल्ह्यातील योजनेशी संलग्नित रुग्णालयांमध्ये संदर्भित करण्यात येईल. या योजनांचा लाभ मिळू न शकणाऱ्या अर्थात या योजनांच्या निकषांच्या कक्षेबाहेरील रुग्णांना मुख्यमंत्री सहाय्यता निधीद्वारे वैद्यकीय उपचारांसाठी अर्थसहाय्य दिले जाते. मुख्यमंत्री वैद्यकीय सहाय्यता निधी कक्ष अंतर्गत संलग्न रुग्णालयांची यादी व पात्रता निकषांसाठी cmrf.maharashtra.gov.in या संकेतस्थळाला भेट द्यावी, असे आवाहन जिल्हा कक्ष अधिकारी ठाकरे यांनी केले आहे.