महाराष्ट्र संवाद न्यूज – अहिल्यानगर
अहिल्यानगरच्या राजकीय आणि सामाजिक क्षेत्रातील आधारस्तंभ, माजी आमदार अरुणकाका बलभीम जगताप यांचे आज, (२ मे २०२५) निधन झाले. पुण्यातील एका खासगी रुग्णालयात त्यांनी वयाच्या ६७ व्या वर्षी अखेरचा श्वास घेतला. त्यांच्या निधनाने संपूर्ण अहिल्यानगर जिल्ह्यात शोककळा पसरली आहे.
अरुणकाका जगताप हे नगर शहर आणि परिसरात त्यांच्या सामाजिक आणि राजकीय कार्यामुळे अत्यंत लोकप्रिय होते. त्यांच्या निधनाची वार्ता समजताच सर्वत्र हळहळ व्यक्त होत आहे. गेल्या काही दिवसांपासून ते पुण्यातील एका रुग्णालयात अतिदक्षता विभागात उपचार घेत होते. डॉक्टरांचे अथक प्रयत्न निष्फळ ठरले आणि आज त्यांची प्राणज्योत मालवली.
अरुणकाकांच्या पश्चात पत्नी पार्वती, चिरंजीव आमदार संग्राम जगताप, दुसरे चिरंजीव माजी जि.प. सदस्य सचिन, सुना आणि नातवंडे असा मोठा परिवार आहे. ते भाजप आमदार शिवाजीराव कर्डिले आणि भानुदासजी कोतकर यांचे व्याही होते.
अरुणकाकांनी आपल्या राजकीय कारकिर्दीची सुरुवात काँग्रेस पक्षातून केली. त्यांनी युवक काँग्रेसचे अध्यक्षपद यशस्वीरित्या भूषविले, यासोबतच ते अहमदनगर पालिकेचे लोकप्रिय नगराध्यक्ष म्हणूनही कार्यरत होते. त्यांनी जिल्हा क्रिकेट संघटनेचे अध्यक्षपद आणि गुणे आयुर्वेद शिक्षण संस्थेचे अध्यक्ष म्हणूनही महत्त्वपूर्ण योगदान दिले. पुढे, ते राष्ट्रवादी काँग्रेस पक्षाकडून विधान परिषदेवर सलग दोन वेळा निवडून गेले आणि त्यांनी आपल्या कामातून एक वेगळी ओळख निर्माण केली.
त्यांचे पार्थिव अंतिम दर्शनासाठी आज दुपारी २ वाजता त्यांच्या सारसनगर, भवानीनगर येथील निवासस्थानी ठेवण्यात येणार आहे. त्यानंतर, दुपारी ४ वाजता अमरधाम स्मशानभूमी, अहिल्यानगर येथे त्यांच्यावर अंत्यसंस्कार होतील.
उपमुख्यमंत्री अजित पवार यांची श्रद्धांजली… “माजी आमदार अरुणकाका जगताप यांच्या दुःखद निधनानं राजकारण, समाजकारण, कला, क्रीडा, शिक्षण, सहकार अशा अनेक क्षेत्रात कार्यरत असलेलं, सामान्यांची घट्ट नाळ जुळलेलं कर्तृत्ववान नेतृत्व हरपलं आहे. तत्कालीन अहमदनगर नगरपालिकेचे अध्यक्ष, जिल्हा क्रिकेट संघटनेचे अध्यक्ष, आयुर्वेद शास्त्र मंडळाचे अध्यक्ष, प्रयोगशील शेतकरी, वारकरी संप्रदायाचा सच्चा पाईक म्हणून ते कायम अहिल्यानगरवासियांच्या लक्षात राहतील. त्यांचे निधन ही अहिल्यानगर जिल्ह्याची मोठी आणि असून त्यांच्या निधनाचा धक्का पचवण्याची शक्ती त्यांचे पुत्र आमदार संग्राम जगताप, संपूर्ण जगताप कुटुंबीय आणि कार्यकर्त्यांना मिळो, अशी प्रार्थना करतो. आम्ही सर्वजण जगताप कुटुंबियांच्या दुःखात सहभागी आहोत. दिवंगत अरुणकाकांच्या आत्म्यास सद्गती लाभो, ही प्रार्थना.,” अशा शब्दात उपमुख्यमंत्री अजित पवार यांनी माजी आमदार अरुणकाका जगताप यांच्या निधनाबद्दल दुःख व्यक्त करून श्रद्धांजली वाहिली आहे.
