संगमनेरची जिजाई झळकली राज्यस्तरावर! प्रज्ञाशोध परीक्षेत जिल्ह्यात द्वितीय, राज्यात सातवा क्रमांक!

महाराष्ट्र संवाद न्यूज – संगमनेर
तालुक्यातील देशमुख मळा (धांदरफळ) येथील जिल्हा परिषद प्राथमिक शाळेतील विद्यार्थिनी जिजाई कुलदीप देशमुख हिने लक्षवेध फाउंडेशनच्या राज्यस्तरीय प्रज्ञाशोध परीक्षेत उत्कृष्ट यश संपादन केले आहे. जिजाईने या परीक्षेत जिल्ह्यात दुसरा, तर संपूर्ण राज्यात सातवा क्रमांक पटकावून शाळेचे आणि तालुक्याचे नाव उज्ज्वल केले आहे.
अहिल्यानगर येथे नुकत्याच झालेल्या एका समारंभात जिजाईला शिक्षण संचालक दिनकर टेमकर, शिक्षणाधिकारी रामदास हराळ, शिक्षण सहसंचालक रमाकांत काटमोरे यांच्यासह अनेक मान्यवरांच्या हस्ते गौरविण्यात आले.
याप्रसंगी सहाय्यक आयुक्त अनिल काळे, विशाल शितोळे, रमेश कासार, ओंकार खुंटाळे, राहुल जगदाळे, क्रांतीज्योती सावित्रीबाई फुले राज्य आदर्श पुरस्कार प्राप्त शिक्षिका वृषाली कडलग, नरेंद्र राठोड, प्रसिद्ध कवी तुकाराम धांडे, कैलास दौंड, प्रा. दादासाहेब कोते आणि शिवछत्रपती पुरस्कार विजेते कबड्डीपटू शंकर गवई आदी उपस्थित होते.
जिजाईच्या या नेत्रदीपक यशात वर्गशिक्षिका वृषाली कडलग यांचे मोलाचे मार्गदर्शन लाभले. तिच्या या कामगिरीबद्दल केंद्रप्रमुख अशोक आवारी, विस्तार अधिकारी एकनाथ भांगरे, मुख्याध्यापक हनुमंत अडांगळे, शाळा व्यवस्थापन समितीचे अध्यक्ष रमेश देशमुख आणि धांदरफळच्या सरपंच उज्वला देशमाने यांनी तिचे मनःपूर्वक अभिनंदन केले आहे. जिजाईच्या या यशाने परिसरात आनंदाचे वातावरण पसरले आहे.