संगमनेर – प्रतिनिधी
संगमनेर शहर पोलिसांनी धाडसी कारवाई करत दोन आरोपींना गावठी पिस्तूल आणि मोबाईलसह अटक केली. ही कारवाई महात्मा फुले शाळेजवळून घुलेवाडीकडे जाणाऱ्या रस्त्यावर करण्यात आली. आरोपींकडून एकूण ६१,००० रुपयांचा मुद्देमाल जप्त करण्यात आला, यात ५०,००० रुपये किमतीचे गावठी पिस्तूल, १०,००० रुपये किमतीचा वन प्लस नोड सी ई २ मोबाईल, आणि १,००० रुपयांचा एक बंद पडलेला मोबाईल फोन यांचा समावेश आहे.
अटक करण्यात आलेल्या आरोपींची नावे शेख मुजम्मील शेख मजिद (वय २२, रा. वाणी मुस्लमान बौध्द वाडा, जमुना, ता. खामगाव, जि. बुलढाणा) आणि जमीरखान नजीरखान (वय ४०, रा. मिलन कॉलनी, ता. खामगाव, जि. बुलढाणा) अशी आहेत. संगमनेर शहर पोलिसांनी त्यांना न्यायालयासमोर हजर केले असता न्यायालयाने ३१ मे पर्यंत पोलीस कोठडी सुनावली आहे.
पोलिस निरीक्षक रवींद्र देशमुख यांना मिळालेल्या गोपनीय माहितीच्या आधारे गुरुवारी (२९ मे) रात्री १ वाजण्याच्या सुमारास पोलिसांनी महात्मा फुले शाळा ते घुलेवाडीकडे जाणाऱ्या रोडवर सापळा रचला. यावेळी अंधारात संशयास्पद स्थितीत फिरताना दिसलेल्या दोन व्यक्तींना ताब्यात घेऊन त्यांची अंगझडती घेतली असता त्यांच्याकडे गावठी पिस्तूल आणि मोबाईल आढळून आले. दोन्ही आरोपींना अटक करण्यात आली आहे.
याप्रकरणी संगमनेर शहर पोलीस ठाण्यात पोलीस हवालदार रामकिशन मुकरे यांनी दिलेल्या फिर्यादीवरून गु.र.नं. ४९१/२०२५, शस्त्र अधिनियम १९५९ चे कलम ३/२५ सह महाराष्ट्र पोलीस अधिनियम १९५१ चे कलम ३७ (१) (३) प्रमाणे गुन्हा दाखल करण्यात आला आहे.
अहिल्यानगरचे पोलीस अधीक्षक सोमनाथ घार्गे, श्रीरामपूरचे अपर पोलीस अधीक्षक वैभव कलुबर्मे आणि संगमनेरचे उपविभागीय पोलीस अधिकारी डॉ. कुणाल सोनवणे यांच्या मार्गदर्शनाखाली ही कारवाई करण्यात आली. पोलीस निरीक्षक रवींद्र देशमुख यांच्या नेतृत्वाखाली सहाय्यक पोलीस निरीक्षक विश्वास भान्सी, पोलीस उपनिरीक्षक रावसाहेब लोखंडे, रामकिशन मुकरे, अतुल दिनकर उंडे, अजित बाळू कुन्हे, संतोष सोपान बाचकर आणि साईनाथ रामदास पवार यांच्या पथकाने ही कारवाई यशस्वी केली. या गुन्ह्याचा पुढील तपास सहाय्यक पोलीस निरीक्षक विश्वास भान्सी करत आहेत.
