महाराष्ट्र संवाद न्यूज –
बनावट वकील स्नेहल हरिश्चंद्र कांबळे (वय ३२) हिने एका महिलेकडून ५ लाख ३० हजार रुपये उकळल्याचा धक्कादायक प्रकार उघडकीस आला आहे. विशेष म्हणजे, गेल्या आठ दिवसांत स्नेहल कांबळेवर दाखल झालेला हा तिसरा गुन्हा आहे. यामुळे तिने केलेल्या आणखी फसवणुकीचे गुन्हे समोर येण्याची शक्यता वाढली असून, परिसरात खळबळ उडाली आहे.
खंडणी स्वीकारताना रंगेहाथ पकडली… स्नेहल कांबळेला यापूर्वी एका शेतकऱ्याकडून खंडणी स्वीकारताना लोणी काळभोर (ता. हवेली) पोलिसांनी रंगेहाथ पकडले होते. तिच्या घराच्या झडतीमध्ये अनेक संशयास्पद कागदपत्रे आढळली. यानंतर, लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी नागरिकांना आवाहन केले होते की, ज्यांची फसवणूक झाली आहे, त्यांनी न घाबरता पुढे येऊन तक्रार करावी. या आवाहनाला प्रतिसाद देत अनेक नागरिक पुढे येत तिच्या विरोधात तक्रारी दाखल करत आहेत.
‘अटकेच्या भीती’ने उकळले ५.३० लाख… पोलिसांनी दिलेल्या माहितीनुसार, सुजाता अशोक गायकवाड (वय ६५, रा. लोहिया नगर, पुणे) या गृहिणी आहेत. त्यांचे पती रिक्षा चालवून कुटुंबाचा उदरनिर्वाह करतात. सुजाता गायकवाड यांच्या लहान मुलाचा आणि सुनेचा किरकोळ कारणावरून नेहमी वाद होत असे. याचा फायदा घेत स्नेहल कांबळेने त्यांना मुलाला सुनेकडून घटस्फोट मिळवून देण्याचे आमिष दाखवले. तिने सुजाता गायकवाड यांचा विश्वास संपादन केला आणि त्यांच्या अज्ञानाचा फायदा घेत त्यांची आर्थिक फसवणूक केली.
स्नेहल कांबळेने सुजाता गायकवाड यांना सांगितले की, त्यांच्या सुनेने त्यांच्याविरुद्ध गुन्हा दाखल केला आहे आणि त्यातून सुटका होण्यासाठी पोलिसांना पैसे द्यावे लागतील. पैसे न दिल्यास पोलीस त्यांना अटक करतील, अशी खोटी कारणे सांगून अटकेची भीती दाखवली. या भीतीपोटी स्नेहल कांबळेने सुजाता गायकवाड यांच्याकडून वेळोवेळी ५ लाख ३० हजार रुपये खंडणी म्हणून स्वीकारले.
या प्रकरणी सुजाता गायकवाड यांनी लोणी काळभोर पोलीस ठाण्यात फिर्याद दिली आहे. त्यानुसार, स्नेहल कांबळेवर कलम ३८४, ३८५, ४२०, ४१६, ४१९ नुसार गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक पूजा माळी करत आहेत.
तीन गुन्हे, साडेबारा लाखांहून अधिकची फसवणूक
स्नेहल कांबळेने आतापर्यंत केलेल्या तीन मोठ्या फसवणुकीचे प्रकार समोर आले आहेत:
* पहिली घटना: कडू सातपुते यांना त्यांच्या मुलाला सुनेकडून घटस्फोट मिळवून देण्याचे आमिष दाखवून सुमारे ६ लाख रुपये उकळले.
* दुसरी घटना: मंदा लांडगे यांच्या मुलीला न्याय मिळवून देऊन तिची मुले परत मिळवून देते असे सांगून १ लाख ३० हजार रुपयांची फसवणूक केली.
* तिसरी घटना: सुजाता गायकवाड यांच्या मुलाला सुनेकडून घटस्फोट मिळवून देण्याचे आमिष दाखवून ५ लाख ३० हजार रुपये खंडणी स्वरूपात स्वीकारले.
या तीन प्रकरणांमध्ये स्नेहल कांबळेने एकूण साडेबारा लाखांहून अधिक रुपये उकळले आहेत. तिच्यावरील गुन्हेगारीचा आकडा वाढण्याची शक्यता असून, पोलीस अधिक तपास करत आहेत.
