संगमनेर, प्रतिनिधी:
आईवडील लग्न समारंभासाठी बाहेरगावी गेल्याची संधी साधत नातेवाईकाने तेरा वर्षे वयाच्या अल्पवयीन मुलीवर बलात्कार केल्याचा व त्यातून ती गर्भवती राहिल्याचा प्रकार समोर आल्यानंतर संगमनेर तालुका पोलिसांनी तात्काळ कारवाई करत यातील मुख्य आरोपीला अटक केली. अटक केलेल्या आरोपीला संगमनेरच्या जिल्हा व अतिरिक्त सत्र न्यायालयाने २० जून पर्यंत पोलीस कोठडी सुनावली आहे.
पंडित हिरामण वैराट असे आरोपीचे नाव आहे. दरम्यान या प्रकारातील अन्य तीन आरोपींचा अजूनही शोध सुरू असून सहाय्यक पोलीस निरीक्षक विकास काळे याप्रकरणी पुढील तपास करत आहे.
रविवारी ही धक्कादायक घटना संगमनेर तालुक्यातून समोर आली होती. घटनेतील पीडित मुलीवर जवळच्या नातेवाईकाने आई-वडील घरी नसल्याचे संधी साधत बलात्कार केला होता. त्यातून पीडित मुलगी पाच महिन्यांची गर्भवती असल्याचे समोर आले होते. बलात्कार करणाऱ्या आरोपीसह चौघात विरोधात संगमनेर तालुका पोलीस ठाण्यात पीडीतेच्या आईने दिलेल्या तक्रारीवरून गुन्हा रजिस्टर नंबर 392/2025 बी एन एस कलम 64, 64 (M)(F), 65, 333, 351(2) पोस्को कायद्याअंतर्गत 4, 5(L),6 प्रमाणे गुन्हा दाखल करण्यात आला होता.
गुन्हा दाखल झालेल्या अन्य आरोपींमध्ये दोन महिलांचा समावेश असून या तिन्ही आरोपींनी फिर्यादीला सोन्याची चैन देतो, पैसे देतो, असे म्हणून आपण हे प्रकरण समंजसपणाने मिटवून घेऊ असे सांगत पीडित मुलीस डोळे विसरून जर तू कुठे बाहेर वाच्यता केली तर तुला जिवंत सोडणार नाही, तुझ्या आई-वडिलांना मारून टाकू अशी विळा दाखवून धमकी दिली होती. दरम्यान या संदर्भात गुन्हा दाखल होताच संगमनेर तालुका पोलिसांनी तातडीने हालचाल करत बलात्कार करणाऱ्या मुख्य आरोपीला ताब्यात घेत न्यायालयासमोर उभे केले.
जिल्हा व अतिरिक्त सत्र न्यायाधीश दिलीप घुमरे यांनी आरोपीला 20 तारखेपर्यंत पोलीस कोठडी सुनावली आहे.
