संगमनेर न्यायालयाने तलाठी मच्छिंद्र रहाणेंचा अटकपूर्व जामीन फेटाळला, पत्नीला जामीन!

महाराष्ट्र संवाद न्यूज ऑनलाईन वृत्त

संगमनेर, प्रतिनिधी: 

घर भाडेकरू असलेल्या महिला आणि तिच्या पतीला मारहाण करून सोन्याचे गंठण व मोबाईल काढून घेतल्या प्रकरणी संगमनेर शहर पोलीस ठाण्यात दाखल असलेल्या गुन्ह्यातील आरोपी तलाठी मच्छिंद्र राहणे याचा अटकपूर्व जामीन अर्ज फेटाळला असून आरोपीच्या पत्नीचा जामीन अर्ज संगमनेर येथील अतिरिक्त सत्र न्यायाधीश मंदार नेरलेकर यांनी मंजूर केला आहे.

तक्रारदार महिला अनिता राहाणे यांच्या घरात भाड्याने राहत असताना, मच्छिंद्र राहाणे रात्री अपरात्री त्रास देत असे आणि लज्जास्पद संदेश पाठवत असे, असा आरोप आहे. १ जुलै २०२५ रोजी दुपारी, अनिता राहाणे आणि अन्य ८-९ महिलांनी फिर्यादीला घराबाहेर ओढून मारहाण केली. यावेळी त्यांच्या गळ्यातील २७,००० रुपयांचे सोन्याचे गंठण आणि २५,००० रुपयांचा मोबाईल काढून घेतल्याचा आरोप आहे. फिर्यादीच्या पतीने मध्यस्थी करण्याचा प्रयत्न केला असता, त्यांनाही मारहाण करण्यात आली.

आरोपींच्यावतीने त्यांच्या वकिलांनी सांगितले की, मच्छिंद्र राहणे हे तलाठी असून त्यांना खोट्या गुन्ह्यात अडकवले जात आहे. घटनेच्या वेळी ते कार्यालयात उपस्थित होते. तसेच, फिर्यादीवरही यापूर्वी गुन्हा दाखल केला असल्याचे नमूद केले. अतिरिक्त सरकारी अभियोक्ता श्री. पी. बी. वाघ यांनीही आरोपींच्या जामिनाला विरोध करत सांगितले की, गुन्हा गंभीर स्वरूपाचा असून, आरोपी फरार आहेत आणि पुराव्यांशी छेडछाड करण्याची शक्यता आहे.

फिर्यादीच्या वकील श्रद्धा राहातेकर यांनी युक्तिवाद केला की, आरोपी मच्छिंद्र हा शासकीय सेवक आहे म्हणजे गुन्हा करणारच नाही असे नाही. त्याच्या पदाचा गैरवापर करून त्याने अटक टाळली आहे. फिर्यादी पक्षाविरुद्ध झालेल्या गुन्ह्याच्या आधारे फिर्यादी पक्षाला लगेच अटक झाली. मोबाईल फोन आणि गंठणाच्या पावत्या दाखल केल्या आहेत. यातील आणखी एक आरोपी पप्पू गोडगे अजूनही समाज माध्यमांवर फिर्यादीची बदनामी करतो. मोबाईलवरील संभाषणाचा पुरावा हस्तगत करणे आवश्यक आहे. पोलिसांनी तक्रार घेण्यास विलंब केला यासाठी फिर्यादीला दोषी ठरवता येणार नाही असेही त्यांनी सांगितले.

न्यायालयाने दोन्ही बाजूंचे युक्तिवाद आणि कागदपत्रे तपासल्यानंतर निरीक्षण केले की, अनिता राहाणे यांचा गुन्ह्यात केवळ मारहाण आणि शिवीगाळ करण्यापुरता सहभाग दिसतो, त्यांना कोठडीची गरज नसल्याने ४०,००० रुपयांच्या जामीन आणि अटींवर जामीन मंजूर करण्यात आला.

मात्र, मच्छिंद्र राहाणे यांच्यावर लज्जास्पद संदेश पाठवणे आणि रात्री अपरात्री त्रास देण्याचा आरोप असल्याने, त्यांच्याकडून मोबाईल फोन जप्त करणे तपासासाठी महत्त्वाचे आहे, असे न्यायालयाने म्हटले. यामुळे तपासात अडथळा येऊ नये म्हणून मच्छिंद्र राहाणे यांचा अटकपूर्व जामीन अर्ज फेटाळण्यात आला.