महाराष्ट्र संवाद न्यूज ऑनलाईन वृत्त
एक धक्कादायक बातमी समोर आली आहे. शहर वाहतूक शाखेच्या नियंत्रण कक्षात कार्यरत असलेले पोलीस हवालदार राजेंद्र विलास गायकवाड (वय ४२) यांनी गळफास घेऊन आत्महत्या केल्याने संपूर्ण पुणे पोलीस दलात खळबळ उडाली आहे. त्यांच्या आत्महत्येचे कारण अद्याप अस्पष्ट आहे.
मिळालेल्या माहितीनुसार, शनिवारी साप्ताहिक सुट्टी असल्याने राजेंद्र गायकवाड हे घरीच होते. त्यांची पत्नी दौंड येथे गेली होती, तर १२ आणि १४ वर्षांची त्यांची दोन्ही मुले शाळेत होती. दुपारच्या सुमारास त्यांच्या पत्नीने त्यांना अनेक वेळा फोन केला, परंतु कोणताही प्रतिसाद मिळाला नाही. यामुळे त्यांना चिंता वाटू लागली.
शाळा सुटल्यावर मुले घरी परतली असता त्यांना घराचा दरवाजा बंद दिसला. त्यांनी ही माहिती शेजाऱ्यांना दिली. शेजाऱ्यांनी तात्काळ विमानतळ पोलिसांना कळवले. पोलीस घटनास्थळी दाखल झाले आणि त्यांनी दरवाजा उघडला असता, राजेंद्र गायकवाड यांनी गळफास घेतल्याचे आढळून आले.
या घटनेने परिसरात हळहळ व्यक्त होत आहे. राजेंद्र गायकवाड यांच्या आत्महत्येमागील कारण अद्याप समोर आलेले नाही. विमानतळ पोलिसांनी या घटनेची अकस्मात मृत्यू अशी नोंद केली असून, पुढील तपास सुरू आहे. त्यांच्या पश्चात पत्नी आणि दोन लहान मुले असा परिवार आहे.
