महाराष्ट्र संवाद न्यूज ऑनलाईन वृत्त – पुणे:
दारूचे व्यसन सोडण्यास नकार देणाऱ्या पतीसोबत नांदण्यास नकार दिल्याने पतीने पत्नीचा गळा चिरून खून केल्याची धक्कादायक घटना पुणे शहरातील लोहगाव परिसरात घडली आहे. या घटनेमुळे परिसरात एकच खळबळ उडाली आहे.
आरोपी पती प्रेम जाधव (वय २७) याला अटक करण्यात आली आहे. ममता जाधव (वय २१) असे खून झालेल्या पत्नीचे नाव आहे. याप्रकरणी रेश्मा राठोड यांनी फिर्याद दिली आहे.
पोलिसांनी दिलेल्या माहितीनुसार, मृत ममता जाधव आणि आरोपी प्रेम जाधव यांचा विवाह २०२० मध्ये झाला होता. प्रेम जाधव याला दारूचे व्यसन होते. ममता वारंवार दारू सोडण्याची विनंती करत होती, परंतु प्रेम दारू सोडत नव्हता. याच कारणावरून दोघांमध्ये सतत वाद होत होते. त्यामुळे गेल्या काही महिन्यांपासून ममता तिच्या कुटुंबीयांसोबत लोहगाव येथे राहत होती.
पत्नीने नांदायला यावे म्हणून प्रेम जाधव अनेक वेळा तिच्याशी संपर्क साधत होता. ‘तुम्ही दारू सोडली तरच मी नांदायला येईन,’ असे ममता प्रत्येक वेळी त्याला सांगत असे. याच दरम्यान, काल रविवारी दुपारी प्रेम जाधव ममताला भेटण्यासाठी लोहगाव येथील तिच्या घरी गेला. त्याने ममताला नांदायला चल असे सांगितले असता, पुन्हा दोघांमध्ये जोरदार भांडण झाले. या भांडणात संतप्त झालेल्या प्रेम जाधवने पत्नी ममताच्या गळ्यावर चाकूने सपासप वार केले.
घराबाहेर बसलेल्या फिर्यादी रेश्मा राठोड यांना आरडाओरड ऐकू आल्याने त्यांनी घरात जाऊन पाहिले असता, आरोपी प्रेम जाधव पत्नीवर चाकूने वार करत असल्याचे दिसले. रेश्मा राठोड यांनी आरोपीला अडवण्याचा प्रयत्न केला असता, प्रेमने त्यांच्या हातावरही चाकूने वार करून घटनास्थळावरून पळ काढला. त्यानंतर ममता जाधव यांना तात्काळ जवळील रुग्णालयात दाखल करण्यात आले, परंतु डॉक्टरांनी त्यांना मृत घोषित केले.
या घटनेतील आरोपी प्रेम जाधव याला काही तासांतच अटक करण्यात आल्याची माहिती विमानतळ पोलीस स्टेशनचे उपनिरीक्षक नितीन राठोड यांनी दिली आहे. या घटनेने लोहगाव परिसरात हळहळ व्यक्त केली जात आहे.
