मुंबई: नियंत्रक शिधा वाटप व संचालक कार्यालयातील मुख्य निरीक्षण अधिकारी विनायक वसंत निकम याला गॅस एजन्सी चालकाकडून १ लाख ७५ हजार रुपयांची लाच घेताना लाचलुचपत प्रतिबंधक विभागाने (एसीबी) काल, (२९ जुलै) रंगेहाथ पकडले. निकमने मासिक ‘हफ्ता’ म्हणून ही रक्कम मागितली होती.
मिळालेल्या माहितीनुसार, तक्रारदार हे कांदिवली येथील एका गॅस एजन्सीमध्ये व्यवस्थापक म्हणून कार्यरत आहेत, तर त्यांच्या नातेवाईकांची ठाण्यात गॅस एजन्सी आहे. ऑक्टोबर २०२४ मध्ये निकमने तक्रारदारांच्या गॅस एजन्सीवर, तर ऑगस्ट २०२४ मध्ये त्यांच्या नातेवाईकांच्या ठाणे येथील गॅस एजन्सीवर कारवाई केली होती.
१६ जुलै २०२५ रोजी निकमने तक्रारदारांना कार्यालयात बोलावले. १७ जुलै रोजी झालेल्या भेटीत निकमने तक्रारदारांच्या गॅस एजन्सीवर पुढील कारवाई न करण्यासाठी दरमहा १,५०,००० रुपये आणि त्यांच्या नातेवाईकांच्या एजन्सीसाठी १,००,००० रुपये, असे एकूण दरमहा २,५०,००० रुपयांची लाच मागितली.
तक्रारदारांनी इतकी मोठी रक्कम देण्यास असमर्थता व्यक्त केल्यानंतर, निकमने साहेबांशी बोलून घेतो असे सांगितले. १८ जुलै रोजी निकमने पुन्हा संपर्क साधून साहेबांशी बोलणे झाले आहे, भेटायला या असे सांगितले. मात्र, तक्रारदारांची लाच देण्याची इच्छा नसल्यामुळे, त्यांनी २५ जुलैला लाचलुचपत प्रतिबंधक विभाग, वरळी, मुंबई येथे तक्रार दाखल केली.
एसीबीने २५ जुलै रोजी केलेल्या पडताळणीत विनायक निकमने तक्रारदारांच्या दोन्ही गॅस एजन्सींवरील कारवाई टाळण्यासाठी दरमहा २,५०,००० रुपयांची लाच मागितल्याचे निष्पन्न झाले. तडजोडीअंती, त्याने तक्रारदारांच्या एजन्सीसाठी १,००,००० रुपये आणि नातेवाईकांच्या एजन्सीसाठी ७५,००० रुपये, असे एकूण १,७५,००० रुपयांचा मासिक ‘हफ्ता’ स्वीकारण्याचे मान्य केले.
या माहितीच्या आधारे, २९ जुलै २०२५ रोजी एसीबीने सापळा रचून विनायक वसंत निकम याला तक्रारदाराकडून १,७५,००० रुपयांची लाच स्वीकारताना रंगेहाथ पकडले. त्याच्याविरुद्ध भ्रष्टाचार प्रतिबंधक अधिनियम १९८८ च्या कलम ७ अन्वये गुन्हा दाखल करण्यात आला आहे.
ही कारवाई सहाय्यक पोलीस आयुक्त मनोज सुतार यांच्या मार्गदर्शनाखाली पोलीस निरीक्षक श्रीमती सुनिता दिघे आणि त्यांच्या पथकाने केली.
