आमदार अमोल खताळ यांच्यावर हल्ला प्रकरणी मध्यरात्री गुन्हा दाखल, आरोपीला चार दिवसांची पोलीस कोठडी; पोलीस उपअधीक्षक व अप्पर पोलीस अधीक्षकांची माहिती

महाराष्ट्र संवाद न्यूज ऑनलाईन

संगमनेर – 

बुधवारी रात्री शहरातील मालपाणी लॉन्स येथे आयोजित संगमनेर फेस्टिवल कार्यक्रमात शिवसेनेचे आमदार अमोल खताळ यांच्यावर हल्ला करण्यात आला. या प्रकरणी शुक्रवारी मध्यरात्री शहर पोलिसांनी गुन्हा दाखल करत आरोपी प्रसाद आप्पासाहेब गुंजाळ (रा. खांडगाव, ता. संगमनेर) याला अटक केल्याची माहिती पोलीस निरीक्षक रवींद्र देशमुख यांनी दिली आहे.

तर पोलीस गुन्ह्याचा सर्व बाजूनी तपास करत असून आरोपीला कोणी चिथावणी दिली किंवा कसे? आरोपी कोणाच्या संपर्कात होता? अन्य कोणी साथीदार आहेत किंवा कसे? या सर्व बाबींचा तांत्रिक पुराव्यांवरून तपास करण्यात येत आहे.

न्यायालयाने आरोपी गुंजाळ याला 2 सप्टेंबर पर्यंत (चार दिवस) पोलीस कोठडी दिल्याची माहिती श्रीरामपूरचे अप्पर पोलीस अधीक्षक सोमनाथ वाघचौरे व संगमनेरचे पोलीस उपअधीक्षक डॉ. कुणाल सोनवणे यांनी दिली.

गुरुवारी रात्री आमदार अमोल खताळ हे संगमनेर फेस्टीव्हलमध्ये सहभागी झाले होते. त्यावेळी मोठा जमाव उपस्थित होता. याच गर्दीचा फायदा घेऊन, हस्तांदोलन करण्याच्या बहाण्याने आरोपी प्रसाद गुंजाळ याने त्यांच्यावर अचानक हल्ला करत त्यांना जीवे मारण्याचा प्रयत्न केला. या घटनेनंतर, संगमनेर शहर पोलीस ठाण्यात गुन्हा रजि. नं. 798/2025, बी.एन.एस. 109, 351(1) नुसार 29 ऑगस्ट 2025 रोजी गुन्हा दाखल करण्यात आला.

या गुन्ह्याचा पुढील तपास पोलीस निरीक्षक रवींद्र देशमुख करत आहेत. नागरिकांनी कोणत्याही अफवांवर विश्वास ठेवू नये किंवा कोणतीही चुकीची माहिती प्रसारित करू नये, असे आवाहनही त्यांनी केले आहे. दरम्यान या प्रकरणी पोलिस यंत्रणा अधिक गोपनीयता बाळगत असल्याचे समोर आले आहे.