अहिल्यानगर एलसीबीची मोठी कारवाई: ओडिसातून तस्करी करून आणलेला ८० लाखांचा गांजा जप्त

अहिल्यानगर – 

स्थानिक गुन्हे शाखेच्या पथकाने ओडिशा राज्यातून तस्करी करून आणलेला तब्बल १२० किलो ९०५ ग्रॅम गांजा जप्त केला आहे. वडगाव गुप्ता परिसरात केलेल्या या कारवाईत पोलिसांनी गांजासह एकूण ८० लाख ८३ हजार ४६४ रुपयांचा मुद्देमाल ताब्यात घेतला असून दोघांना अटक केली आहे.

पोलिसांना गुप्त माहितीदाराकडून मिळालेल्या माहितीनुसार, ओडिशा राज्यातून गांजाची मोठी खेप अहिल्यानगरमध्ये विक्रीसाठी आणली जात होती. त्यानुसार, स्थानिक गुन्हे शाखेचे पोलीस निरीक्षक किरणकुमार कबाडी यांच्या मार्गदर्शनाखाली पथकाने सापळा रचला. शेंडी बायपास ते एम.आय.डी.सी. रोडवर वडगाव गुप्ता गावाजवळ हॉटेल किनाराजवळ पोलिसांनी एक संशयित ट्रक (एम.एच. १४ जी. यु. २१११) थांबवला.

यावेळी ट्रकची तपासणी केली असता, त्यात नवनाथ अंबादास मेटे (वय ३८, रा. श्रीगोंदा) आणि ज्ञानेश्वर दत्तात्रय फुंदे (वय ३१, रा. शेवगाव) हे दोघे आढळून आले. ट्रकच्या केबिनवरील टपावर ६ गोण्यांमध्ये १२० किलो ९०५ ग्रॅम गांजा लपवलेला होता. याची किंमत ३० लाख २२ हजार ६२५ रुपये आहे. गांजासह ट्रक आणि इतर साहित्य असा एकूण ८० लाख ८३ हजार ४६४ रुपयांचा मुद्देमाल जप्त करण्यात आला.

स्थानिक गुन्हे शाखेचे पोलीस निरीक्षक किरणकुमार कबाडी यांच्या मार्गदर्शनाखाली स्थानिक गुन्हे शाखेतील पोलीस उपनिरीक्षक अनंत सालगुडे, राजेंद्र वाघ, पोलीस अंमलदार अतुल लोटके, गणेश लोंढे, संतोष खैरे, दिपक घाटकर, फुरकान शेख, लक्ष्मण खोकले, राहुल द्वारके, अमृत आढाव, आकाश काळे, रमिझराजा आतार, प्रकाश मांडगे, सागर ससाणे, भगवान धुळे, उमाकांत गावडे, अरुण मोरे, जयराम जंगले यांच्या पथकाने ही कारवाई केली आहे.

अटक करण्यात आलेल्या दोन्ही आरोपींविरोधात स्थानिक गुन्हे शाखेचे पोलीस कॉन्स्टेबल प्रकाश मांडगे यांनी दिलेल्या फिर्यादीवरून एम.आय.डी.सी. पोलीस ठाण्यात गुन्हा रजिस्टर नंबर ६५० / २०२५ गुंगीकारक औषधिद्रव्ये आणि मनोव्यापारावर परिणाम करणारे पदार्थ कायदा सन १९८५ चे कलम ८ (क), २० (ब) ii (क) अन्वये गुन्हा दाखल करण्यात आला असून, पुढील तपास स्थानिक गुन्हे शाखेचे उपनिरीक्षक अनंत सालगुडे करत आहेत.