कंटेनर हॉटेलमध्ये घुसला, हॉटेलचे मोठे नुकसान

संगमनेर – 

सोमवारी पहाटे पुणे-नाशिक महामार्गावर रायतेवाडी फाटा येथे एक भरधाव वेगातील कंटेनर हॉटेलमध्ये शिरल्याने मोठी दुर्घटना घडली. या घटनेत हॉटेलचे लाखो रुपयांचे नुकसान झाले असले तरी, सुदैवाने हॉटेल मालक बचावले आहेत.

मिळालेल्या माहितीनुसार, नाशिकहून पुण्याकडे जात असलेल्या एका भरधाव कंटेनरच्या (क्रमांक HR 55 AT 2926) चालकाला झोपेची डुलकी लागली. यामुळे त्याचे वाहनावरील नियंत्रण सुटले आणि कंटेनर थेट महामार्गालगतच्या ‘हॉटेल दिव्यांका’ मध्ये शिरला. हा अपघात पहाटे ५ ते ५:१५ च्या सुमारास घडला.

ज्यावेळी हा अपघात झाला, त्यावेळी हॉटेलचे मालक दत्तात्रेय मांडेकर हॉटेलच्या आत झोपले होते. मोठा आवाज झाल्याने त्यांना जाग आली आणि समोरचे दृश्य पाहून त्यांना धक्काच बसला. त्यांनी आरडाओरडा केल्यावर परिसरातील लोक जमा झाले. अपघातात हॉटेलच्या सामानाचे मोठ्या प्रमाणात नुकसान झाले आहे.

घटनेची माहिती मिळताच संगमनेर शहर पोलिसांनी तात्काळ घटनास्थळी धाव घेतली. क्रेनच्या मदतीने कंटेनर बाहेर काढण्यात आला असून, चालकाला पोलिसांनी ताब्यात घेतले आहे. या घटनेमुळे महामार्गावर काही काळ वाहतुकीला अडथळा निर्माण झाला होता. या अपघातामुळे हॉटेल मालकाचे मोठे आर्थिक नुकसान झाले असून, पुढील तपास पोलीस करत आहेत.