संगमनेर – अहिल्यानगर एलसीबीच्या पोलीस पथकाने संगमनेरमध्ये केलेल्या कारवाईत पोलिसांनी अवैध दारू विक्री करणाऱ्यांवर गुन्हे दाखल केले आहे. तसेच कारवाई दरम्यान पकडलेली दारू ही वेदांत वाईन्समधून घेतल्याची कबुली आरोपींनी दिली असली तरी वेदांत वाईन्समधून अशा प्रकारे कुठल्याही प्रकारे मद्याची नियमबाह्य विक्री झालेली नसून याप्रकरणीचे दावे फेटाळताना संबंधितांनी एक-दोन बाटल्यांच्या माध्यमातून अवैध साठा करून त्याची विक्री केल्याची शक्यता वेदांत वाईन्सच्या संचालकांनी वर्तवली आहे.
एलसीबीच्या कारवाईत अवैध मद्य विक्री केल्याप्रकरणी संबंधित आरोपींसह वेदांत वाईन्सच्या चालक-मालकांवर गुन्हे दाखल करण्यात आले, या अनुषंगाने संबंधितांनी सर्व आरोप फेटाळून लावत यासंबंधी एका पत्रकार परिषदेच्या माध्यमातून खुलासा केला आहे. संबंधित प्रकार व्यापारी स्पर्धेतून बदनामीचा असल्याचे त्यांनी म्हटले आहे.
वेदांत वाईन्सचे मालक स्वामी डाके यांनी सर्व आरोप फेटाळून लावताना पत्रकार परिषदेत म्हटले आहे की, नियमांचे पालन करूनच केवळ वैध परवानाधारकांनाच शासकीय मर्यादेत मद्यविक्री केली जात आहे. तसेच या कारवाईमुळे आमच्या प्रतिष्ठित 17-18 वर्षांच्या परंपरेला आणि ग्राहकांच्या विश्वासाला तडा गेल्याचा आम्हाला खेद वाटतो. मात्र, ‘जो दोषी आहे त्याच्यावर कारवाई झालीच पाहिजे,’ ही आमची ठाम भूमिका आहे.
एका वृत्तपत्रात वेदांत वाईन्स शॉपमधून ‘खोके विक्री’ आणि ‘अल्पवयीन मुलांना मद्य विक्री’ होत असल्याची बातमी प्रकाशित झाली होती, ती पूर्णपणे चुकीची असल्याचे त्यांनी स्पष्ट केले. वेदांत वाईन्समध्ये विक्री करताना ग्राहकांकडे वैध परवाना आहे की नाही, याची खात्री केली जाते. काही ग्राहकांना एक दिवसाचा, काहींना एक वर्षाचा, तर काहींना लाइफटाईम परवाना असतो. अल्पवयीन मुलांना मद्य विक्री करणे, हे आम्ही कधीच करत नाही. या कारवाईमागे व्यापारी वर्गातील प्रतिस्पर्ध्यांचे षडयंत्र असल्याचा संशय त्यांनी व्यक्त केला आहे.
अहिल्यानगर स्थानिक गुन्हे शाखेच्या (एलसीबी) पथकाने जप्त केलेल्या मुद्देमालावर बोलताना स्वामी डाके यांनी खुलासा केला की, हा साठा पूर्ण बॉक्समध्ये नसून, फक्त 24 बाटल्या एका ठिकाणी आणि 34 बाटल्या दुसऱ्या ठिकाणी कारवाईदरम्यान सापडल्या आहेत. हा साठा दोन-तीन लोकांच्या माध्यमातून गोळा करून एकत्रित केलेला तसेच ड्राय डे च्या पार्श्वभूमीवर देखील अगोदर काही लोक आगाऊ दारू खरेदी करत असतात, त्या माध्यमातून केलेला हा मद्याचा साठा असू शकतो, असे स्पष्टीकरण त्यांनी दिले.
शेवटी, सत्य लपवता येत नाही, आमच्यावर कितीही आरोप झाले तरी सत्य आमच्या बाजूने उभे राहील, असा विश्वास त्यांनी व्यक्त केला आहे.
‘त्या’ कारवाई प्रकरणी वेदांत वाईन्सच्या मालकांचा पत्रकार परिषदेतून खुलासा, नियमबाह्य मद्य विक्री नाही तर…
एका वृत्तपत्रात आलेल्या वृत्तात वेदांत वाईन्स शॉपमधून 'खोके विक्री' आणि 'अल्पवयीन मुलांना मद्य विक्री' होत असल्याची बातमी प्रकाशित झाली होती, ती पूर्णपणे चुकीची असल्याचे त्यांनी स्पष्ट केले.
