संगमनेर – सहकारमहर्षी भाऊसाहेब थोरात यांच्या आदर्श तत्वांवर यशस्वी वाटचाल करणाऱ्या थोरात सहकारी साखर कारखान्याने यंदाच्या दिवाळीनिमित्त शेतकरी, ऊस उत्पादक, कामगार आणि सभासदांसाठी आनंदाची मोठी घोषणा केली आहे. कारखान्याचे विद्यमान चेअरमन माजी मंत्री बाळासाहेब थोरात यांनी ही महत्त्वपूर्ण घोषणा केली, यामुळे या सर्व घटकांची दिवाळी गोड होणार आहे.
माजी मंत्री बाळासाहेब थोरात म्हणाले की, सहकारामुळे ग्रामीण अर्थव्यवस्था मजबूत झाली आहे. संगमनेर शहरातील बाजारपेठ भरलेली आहे. अमृत उद्योग समूहातून विविध संस्थांमधून सुमारे १०० कोटी रुपये बाजारात येत असल्याने संगमनेरकरांची दिवाळी ही आनंदाची होणार असल्याचे त्यांनी सांगितले.
दिवाळीनिमित्त सन २०२४-२५ या गाळप हंगामात गाळपास आलेल्या उसास कार्यक्षेत्रातील ऊस उत्पादकांना २०० रुपये प्रति टन तर कार्यक्षेत्राबाहेरील ऊस उत्पादकांना १०० रुपये प्रति टन अनुदान दिले जाणार आहे. या अनुदानामुळे कार्यक्षेत्रातील ऊस उत्पादकांना एकूण ३२०० प्रति टन इतका उच्चांकी भाव मिळणार आहे, यामुळे शेतकरी व ऊस उत्पादकांमध्ये आनंदाचे वातावरण आहे.
शेतकऱ्यांसोबतच कामगारांचेही हित जपले गेले आहे. दरवर्षीप्रमाणे कारखान्याकडून कामगारांसाठी २०% बोनस आणि ३० दिवसांचे सानुग्रह अनुदान दिले जाणार आहे. यामुळे सर्व कर्मचारी व त्यांच्या कुटुंबीयांमध्ये मोठे आनंदाचे वातावरण निर्माण झाले आहे.
याशिवाय, सभासदांसाठी एक विशेष भेट जाहीर करण्यात आली आहे. दरवर्षी दीपावलीनिमित्त कारखान्याकडून १५ किलो मोफत साखर दिली जात असे, परंतु यावर्षी प्रत्येक शेअर्ससाठी ३० किलो मोफत साखर देण्यात येणार आहे, अशी घोषणा माजी मंत्री थोरात यांनी केली आहे. साखर घेण्यासाठी येताना सभासदांनी आपले डिजिटल कार्ड किंवा सोसायटीचे हमीपत्र व अधिकार पत्र घेऊन यावे, असे आवाहन कार्यकारी संचालक जगन्नाथ घुगरकर यांनी केले आहे.
Post Views: 4,502
