अहिल्यानगर – पोलीस अधीक्षक सोमनाथ घार्गे यांच्या आदेशानुसार, स्थानिक गुन्हे शाखेने मोठी कारवाई करत कत्तलीसाठी आणलेली चार गोवंशीय जनावरे ताब्यात घेतली आहेत. या कारवाईत जनावरे आणि वाहतुकीसाठी वापरलेले पिकअप वाहन असा एकूण ६,६०,०००/- (सहा लाख साठ हजार रुपये) किमतीचा मुद्देमाल जप्त करण्यात आला आहे.
जिल्ह्यातील अवैध कत्तलखान्यांची माहिती काढून कारवाई करण्याचे निर्देश पोलीस अधीक्षकांनी स्थानिक गुन्हे शाखेला दिले होते. यानुसार, स्थानिक गुन्हे शाखेचे पोलीस निरीक्षक श्री. किरणकुमार कबाडी यांच्या मार्गदर्शनाखाली सहाय्यक पोलीस निरीक्षक हरिष भोये, पोलीस उपनिरीक्षक दिपक मेढे, तसेच पोलीस अंमलदार दिपक घाटकर, शामसुंदर गुजर, बिरप्पा करमल, सोमनाथ झांबरे, राहुल डोके, विशाल तनपुरे, महादेव भांड यांच्या पथकाने सोनई पोलीस ठाणे हद्दीत माहिती काढण्यास सुरुवात केली.
शनिवारी माहिती काढत असताना, पथकाला आसिफ शेख आणि अविनाश बराटे हे दोघे गोवंशीय जनावरे कत्तल करण्याच्या उद्देशाने घेऊन जात असल्याची माहिती मिळाली. या माहितीच्या आधारे पथकाने तातडीने बराटे वस्ती, घोडेगाव या ठिकाणी जाऊन खात्री केली असता, दोन व्यक्ती पिकअप वाहनातून जनावरे खाली उतरवताना आढळले.
पोलिसांनी या दोन्ही इसमांना ताब्यात घेतले. त्यांनी त्यांची नावे असिफ अतिक शेख (वय २८, रा. चांदा, ता. नेवासा) आणि अविनाश मोहन बराटे (वय ३७, रा. बराटे वस्ती, घोडेगाव, ता. नेवासा) अशी सांगितली. पोलिसांनी आरोपींच्या ताब्यातून १,६०,०००/- रुपये किमतीची ०४ गोवंशीय जिवंत जनावरे आणि ५,००,०००/- रुपये किमतीची पिकअप गाडी (क्र. एम.एच. १७ बी. डी. ०११२) असा एकूण ६,६०,०००/- रुपयांचा मुद्देमाल जप्त केला.
याप्रकरणी, पोलीस अंमलदार सोमनाथ झांबरे (स्थानिक गुन्हे शाखा) यांच्या फिर्यादीवरून सोनई पोलीस ठाण्यात आरोपींविरुद्ध गु.र.नं. ३७१/२०२५ नुसार महाराष्ट्र प्राणी संरक्षण अधिनियम कलम ५ (अ), ५(ब), ९(ब) आणि प्राण्यांना निर्दयतेने वागविणेचे कलम ३ व ११ प्रमाणे गुन्हा नोंदवण्यात आला आहे. या गुन्ह्याचा पुढील तपास सोनई पोलीस स्टेशन करत आहे.
