संगमनेर – ज्येष्ठ तमाशा कलावंत स्व. कांताबाई सातारकर यांच्या नावाने दिला जाणारा पहिला पुरस्कार वाई (सातारा) येथील ज्येष्ठ तमाशा कलावंत कोंडीराम लक्ष्मण आवळे मास्तर यांना जाहीर झाला आहे.
आमदार अमोल खताळ यांनी दिलेल्या माहितीनुसार, या पुरस्काराचे वितरण २ नोव्हेंबर २०२५ रोजी सकाळी १०.३० वाजता संगमनेर येथील मालपाणी लॉन्समध्ये होणार आहे. या सोहळ्याला उद्योग तथा मराठी भाषा विभागाचे मंत्री उदय सामंत यांची प्रमुख उपस्थिती असून, जलसंपदा मंत्री राधाकृष्ण विखे पाटील हे अध्यक्षस्थानी असतील.
आ. खताळ यांनी सांगितले की, कवी अनंत फंदी, स्व. पवळा भालेराव, स्व. गुलाबबाई संगमनेरकर, लोकशाहीर विठ्ठल उमप आणि स्व. कांताबाई सातारकर यांच्या नावाने दरवर्षी राज्यातील कलावंतांना सन्मानित करण्याचा निर्णय घेण्यात आला आहे. मुंबई विद्यापीठातील कला विभागाचे प्रमुख प्रा. गणेश चंदनशिवे यांच्या अध्यक्षतेखालील निवड समितीने आवळे मास्तर यांची निवड केली.
१९७३ पासून तमाशा कलेत सक्रिय असलेल्या आणि सात वगनाट्ये शब्दबद्ध करणाऱ्या आवळे मास्तरांनी पारंपरिक तमाशा कला जिवंत ठेवण्यासाठी केलेल्या महत्त्वपूर्ण योगदानाचा गौरव म्हणून हा पुरस्कार देण्यात येत आहे.
