जीवनदान श्रेष्ठदान! संगमनेरात इंदिरा गांधींच्या स्मृतिप्रीत्यर्थ राहुल गांधी समर्थक संघ महाराष्ट्र’चे (RGSS) रक्तदान शिबिर उत्साहात; नागरिकांचा सहभाग

संगमनेर – देशाच्या पहिल्या महिला पंतप्रधान, ‘आयर्न लेडी’ स्व. इंदिरा गांधी यांच्या पुण्यतिथीचे औचित्य साधून, ‘राहुल गांधी समर्थक संघ महाराष्ट्र’ (RGSS) यांच्यावतीने संगमनेर येथे आयोजित करण्यात आलेले भव्य रक्तदान शिबिर शुक्रवारी (दिनांक ३१ ऑक्टोबर) यशस्वीपणे पार पडले. ‘रक्तदान श्रेष्ठदान’ या उदात्त हेतूने आयोजित या शिबिराला संगमनेरवासीयांनी उस्फूर्तपणे चांगला प्रतिसाद दिला. नाशिक पदवीधर मतदार संघाचे माजी आमदार डॉ. सुधीर तांबे यांनी देखील शिबिर स्थळी भेट देऊन या उपक्रमाचे कौतुक केले.

माजी पंतप्रधान इंदिरा गांधी यांना आदरांजली वाहण्यासाठी ‘जीवनदानाचा संकल्प’ करत राहुल गांधी समर्थक संघाने हा स्तुत्य उपक्रम हाती घेतला होता. शिबिरादरम्यान नवीन नगर रस्त्यावरील स्वर्गीय इंदिरा गांधी यांच्या पुतळ्याला पुष्पहार अर्पण करून आदरांजली वाहण्यात आली. संगमनेर येथील बस स्टॅन्ड परिसरात सकाळी ८ वाजल्यापासून ते दुपारी ४ वाजेपर्यंत आयोजित या शिबिरात परिसरातील युवक-युवती, सामाजिक कार्यकर्ते आणि नागरिकांनी मोठ्या संख्येने उपस्थित राहून रक्तदान केले.

रक्तदान हे सर्वात मोठे दान मानले जाते. अपघातात जखमी झालेल्यांपासून ते गंभीर आजारांशी लढणाऱ्या रुग्णांपर्यंत अनेकांना रक्ताची तातडीने गरज असते. अशावेळी केलेले रक्तदान हे खऱ्या अर्थाने जीवन संजीवनी ठरते, या उदात्त विचाराने प्रेरित होऊन नागरिक या पुण्यकार्यात सहभागी झाले.

या शिबिरात अर्पण या नामांकित रक्तपेढीच्या सहकार्याने रक्त संकलन करण्यात आले. यासोबतच, रक्तदात्यांची मोफत रक्तगटाची चाचणी आरोग्य कर्मचाऱ्यांकडून करण्यात आली.

राहुल गांधी समर्थक संघ महाराष्ट्रच्या वतीने आयोजित या भव्य रक्तदान शिबिरामध्ये संगमनेर परिसरातील नागरिकांनी प्रचंड सहभाग घेऊन, गरजूंच्या जीवनात आशेचा किरण निर्माण करण्याच्या या महत्त्वपूर्ण प्रयत्नाला यश मिळवून दिले. 

राम अरगडे, मोहसीन रशीद शेख, शंतनू भालेकर, प्रकाश कडलग, सतीश खताळ, अमोल शेलकर, प्रदीप धाडीवाल, अरुण गावित्रे, कल्याण जोर्वेकर, रवींद्र हासे, अनिल राऊत, सोमनाथ हासे, अक्षय मोहिते, प्रणव नवले, गणेश जगताप, राहुल वर्पे, शशी माघाडे, ॲड. अमित सोनवणे, किशोर खताळ, सुभाष कोकणे, बाळासाहेब जाधव, मोहसीन खलील शेख आदी आयोजकांनी सर्व रक्तदात्यांचे आणि सहकार्य करणाऱ्या संस्थांचे विशेष आभार मानले.