‘Sangamner Politics’ ला मोठा झटका! आचारसंहितेत आमदारांचा फोटो ‘मॅनिप्युलेट’ केल्याप्रकरणी BNS कलमांखाली संगमनेरमध्ये गुन्हा दाखल

संगमनेर –
संगमनेर नगरपालिकेच्या निवडणुकीच्या पार्श्वभूमीवर आमदार अमोल खताळ यांच्याविरोधात सोशल मीडियावर बदनामीकारक आणि आचारसंहितेच्या काळात दिशाभूल करणारा मजकूर प्रसारित केल्याप्रकरणी संगमनेर शहर पोलिसांनी एका अज्ञात व्यक्तीविरोधात गुन्हा दाखल केला आहे. अक्षय दिलीप चिलप यांनी याबाबत संगमनेर शहर पोलीस ठाण्यात १४ नोव्हेंबर २०२५ रोजी दुपारी अडीच वाजता तक्रार दाखल केली.
दाखल झालेल्या तक्रारीनुसार, अज्ञात व्यक्तीने बोगस फेसबुक अकाउंट वापरून ‘Sangamner Politics’ या नावाच्या फेसबुक अकाउंटवरून आमदार खताळ यांचा फोटो संपादित करून, बनावट आणि खोटी माहिती असलेली पोस्ट प्रसारित केली. तक्रारदाराच्या म्हणण्यानुसार, ही पोस्ट पूर्णपणे चुकीची असून ती केवळ राजकीय हेतूने प्रेरित आहे. या पोस्टद्वारे आमदारांची बदनामी करणे, तसेच निवडणुकीच्या आचारसंहितेचे उल्लंघन करणे हा मुख्य उद्देश होता.
या गंभीर प्रकाराची दखल घेत, शहर पोलिसांनी या अज्ञात व्यक्तीविरोधात भारतीय न्याय संहिता (BNS) चे कलम 352, 353(2) आणि 356(2) अंतर्गत हा गुन्हा नोंदविण्यात आला.
सध्या संगमनेर नगरपरिषद निवडणुकीची आचारसंहिता लागू असताना, जाणीवपूर्वक दोन राजकीय गटांमध्ये द्वेषाची भावना निर्माण करण्याच्या हेतूने ही पोस्ट करण्यात आली आहे, असे गंभीर आरोप तक्रारीत करण्यात आले आहेत. या माध्यमातून राजकीय वातावरण गढूळ करण्याचा प्रयत्न करणाऱ्यांवर कडक कारवाई करण्याची गरज असल्याचे तक्रारदाराने म्हटले आहे. संगमनेर शहर पोलिसांनी याप्रकरणी तपास सुरू केला आहे.