संगमनेर पालिकेच्या निवडणुकीच्या रिंगणात खळबळ: नगराध्यक्षपदाच्या शिवसेना उमेदवारावर ‘दुहेरी मतदारा’चा सुषमा तवरेज यांचा आक्षेप, कायदेशीर बाबींमुळे उमेदवारी अर्ज धोक्यात येण्याची शक्यता!

संगमनेर – अनंत पांगारकर

संगमनेर नगरपालिकेच्या होऊ घातलेल्या नगराध्यक्षपदाच्या निवडणुकीत शिवसेनेच्या उमेदवार श्रीमती सुवर्णा विठ्ठल रहाणे उर्फ सुवर्णा संदीप खताळ यांच्या उमेदवारी अर्जावर नगराध्यक्षपदाच्या दुसऱ्या अपक्ष उमेदवार सुषमा तवरेज यांनी कायदेशीर आक्षेप नोंदवत अर्ज अवैध ठरविण्याची मागणी केल्याने निवडणुकीच्या रिंगणात मोठी खळबळ उडाली आहे. हा आक्षेप थेट ‘दुहेरी मतदार नोंदणी’शी संबंधित असून, यामुळे उमेदवारी अर्जाची वैधता धोक्यात येण्याची चिन्हे निर्माण झाली आहे.

संगमनेर नगर परिषद निवडणुकीसाठी नियुक्त केलेले निवडणूक निर्णय अधिकारी अरुण मुंडे यांच्याकडे तवरेज यांनी हा आक्षेप नोंदविला आहे. यात त्यांनी म्हटले आहे की, श्रीमती सुवर्णा विठ्ठल रहाणे उर्फ सुवर्णा संदीप खताळ यांनी नगराध्यक्षपदासाठी उमेदवारी अर्ज दाखल केला आहे. मात्र, खताळ यांचे नाव एकाच वेळी दोन वेगवेगळ्या स्थानिक स्वराज्य संस्थांच्या मतदार यादीत समाविष्ट आहे.

श्रीमती सुवर्णा विठ्ठल रहाणे उर्फ सुवर्णा संदीप खताळ यांच्या नावाची मतदार नोंदणी संगमनेर नगरपालिका मतदार यादीत यादीतील भाग क्र.157, अनुक्रमांक क्र. 339, South North Building Room No.4 From North, sir DM Petit Highschool, Akole bypas road Sangamner अशी असून दुसरी मतदार नोंदणी घुलेवाडी मतदार यादीतील भाग क्र. 52, अनुक्रमांक क्र. 339, East west Building Room No.3 from East. Sau Mathurabai Bhausaheb Thorat Madhyamik Vidyalaya Ghulewadi येथे देखील असल्याचे त्यांनी म्हटले आहे.

लोकप्रतिनिधित्व अधिनियम, १९५० चे कलम १७ आणि १८ या कलमांनुसार, एकाच व्यक्तीचे नाव एकापेक्षा जास्त मतदार यादीत असणे हे कायद्याचे उल्लंघन मानले जाते आणि अशा परिस्थितीत उमेदवारी अर्ज अवैध ठरवला जाऊ शकतो. आक्षेप घेणाऱ्या तक्रारदार सुषमा संजय तवरेज यांनी निवडणूक निर्णय अधिकाऱ्यांकडे तातडीने दोन्ही मतदार याद्यांची पडताळणी करण्याची विनंती केली आहे. सदर उमेदवाराने दोन ठिकाणी मतदान करण्याचा अधिकार मिळवून कायद्याचे उल्लंघन केले आहे. त्यामुळे त्यांची उमेदवारी त्वरित अपात्र ठरवावी, अशी मागणी त्यांनी पत्राद्वारे केली आहे.

या गंभीर आक्षेपामुळे आता सर्वांचे लक्ष निवडणूक निर्णय अधिकाऱ्यांच्या निर्णयाकडे लागले आहे. दोन्ही ठिकाणच्या मतदार यादीतील तपशील (पत्ते आणि अनुक्रमांक) सादर करण्यात आले असून, निवडणूक निर्णय अधिकारी या आक्षेपावर काय निर्णय घेतात आणि श्रीमती सुवर्णा खताळ यांच्या उमेदवारीचे भवितव्य काय असेल, हे पाहणे महत्त्वाचे ठरणार आहे.