सहकार तालुक्याचा श्वास असणाऱ्या संगमनेरला गुन्हेगारीचे ग्रहण, ड्रग्ज, हुक्का, हप्तेखोरी; संगमनेरच्या प्रगतीसाठी अपप्रवृत्तींचा बिमोड करा – माजी मंत्री बाळासाहेब थोरात

संगमनेर:

सहकार हा संगमनेर तालुक्याचा श्वास राहिला आहे. मात्र गेल्या काही दिवसात तालुक्याचे सहकार समृद्धीची घडी विस्कटक चालली असून तालुक्यात अपप्रवृत्तींचा शिरकाव झाला आहे. तालुक्यातील शांतता व समृद्धी कायम राखण्यासाठी या गैर अपप्रवृत्तींचा सर्वांनी एकत्र येऊन बीमोड करण्याची आवश्यकता असल्याचे प्रतिपादन माजी मंत्री आणि लोकनेते बाळासाहेब थोरात यांनी केले.

हंगेवाडी (संगमनेर) येथे सुभाषचंद्र बोस पतसंस्थेच्या नूतन इमारत लोकार्पण सोहळ्याच्या निमित्ताने थोरात बोलत होते.

यावेळी व्यासपीठावर माजी आमदार डॉ. सुधीर तांबे, जिल्हा बँकेचे संचालक गणपतराव सांगळे, संगमनेर तालुका दूध उत्पादक संघाचे अध्यक्ष रणजीतसिंह देशमुख, शंकरराव खेमनर, डॉ. जयश्रीताई थोरात, सुधाकर जोशी, संपतराव डोंगरे, शरद नाना थोरात, आर. बी. राहणे, राजेंद्र चकोर, दिलीप नागरे, प्रतीक सांगळे, रमेश सांगळे, दीपक कांगणे, सरपंच श्रीमती कमल कांगणे, सिताराम वर्पे, मीनानाथ वर्पे, नारायण नागरे, यांच्यासह परिसरातील नागरिक मोठ्या संख्येने उपस्थित होते.

संगमनेर तालुक्याच्या योगदानात सहकाराचे महत्व अधोरेखित करताना थोरात यांनी स्वर्गीय यशवंतराव चव्हाण व भाऊसाहेब थोरात यांच्या योगदानामुळे सहकार चळवळ रुजल्याचे सांगितले. यामुळेच तालुक्यात आर्थिक समृद्धी आली आहे. तालुक्यातील पतसंस्थांमध्ये सुमारे २००० कोटींच्या ठेवी असून, सहकार हा या भागाचा श्वास आहे, असे थोरात म्हणाले. यावेळी त्यांनी गणपतराव सांगळे यांच्या नेतृत्वाखालील सुभाषचंद्र बोस पतसंस्थेचे काम पारदर्शक आणि उत्कृष्ट असल्याबद्दल गौरवोद्गार काढले.

निळवंडे धरण व कालवे आपण पूर्ण केली त्यामुळे तालुक्यामध्ये चांगले पाणी आले आहे. शेतकऱ्यांनी जास्तीत जास्त ऊस लागवड करावी असे सांगताना सत्ता येते आणि जाते मात्र तरुण पिढीचे भविष्य आपण जपले पाहिजे असे सांगत, थोरात यांनी यावेळी तालुक्यातील वाढत्या गुन्हेगारी स्वरूपाच्या घटनांवर सखोल भाष्य केले. ते म्हणाले की, सध्या तालुक्यात मारहाण, अमली पदार्थांची तस्करी, आणि वाळू-मुरुमाच्या जोरावर होणारी दादागिरी मोठ्या प्रमाणात वाढली आहे. ड्रग्स, हुक्का, नशीली पदार्थ संगमनेरमध्ये मिळत आहेत. 

संगमनेर बस स्थानकावर विरोधकांच्या वतीने काढण्यात आलेल्या मोर्चाचे नेतृत्व करणारा एक पुढारी या रॅकेटचा चालक आहे. हे लोक संगमनेर तालुक्यात आले कसे? यांना कुणाचा वरदहस्त आहे? असा सवाल उपस्थित करत या वाढत्या गुन्हेगारी प्रवृत्तींमागील कारणांची मीमांसा करताना त्यांनी फोफावलेल्या हप्तेखोरीवर बोट ठेवले. 

तालुक्याची चांगली परंपरा व शांतताप्रिय ओळख जपण्यासाठी थोरात यांनी पोलिसांनी या वाईट गोष्टी वेळीच रोखल्या पाहिजेत, अशी थेट मागणी केली. तसेच, तालुक्यात घुसू पाहणाऱ्या अपप्रवृत्तींचा सगळ्यांनी मिळून बिमोड करा, असे स्पष्ट निर्देश त्यांनी उपस्थित नागरिकांना दिले.

माजी आमदार तांबे म्हणाले, पतसंस्था चळवळीमुळे शेतकरी माणसाला मोठी मदत झाली असून सुभाष चंद्र बोस पतसंस्थेने सातत्याने चांगलं काम केले आहे. यावेळी रणजीतसिंह देशमुख यांचे देखील भाषण झाले. प्रास्ताविक गणपतराव सांगळे यांनी केले तर प्रतीक सांगळे यांनी आभार मानले. यावेळी परिसरातील शेतकरी नागरिक युवक व महिला मोठ्या संख्येने उपस्थित होते. लोकनेते बाळासाहेब थोरात व मान्यवरांची यावेळी वाजत गाजत मिरवणूक काढण्यात आली.