संगमनेर – संगमनेर नगरपालिका निवडणुकीत ऐनवेळी मोठा राजकीय ‘ट्विस्ट’ आला आहे. निष्ठावान कार्यकर्त्यावर अन्याय झाल्याचे कारण देत भारतीय जनता पक्षाच्या (भाजप) माजी नगरसेविका मेघा दीपक भगत यांनी थेट बंडखोरी केली आहे. त्यांनी नगराध्यक्षपदासाठी आपली अपक्ष उमेदवारी कायम ठेवल्याने भाजपमध्ये खळबळ उडाली असून, पक्षाने त्यांच्यावर तातडीने कारवाई केली आहे.
भाजपचे उत्तर नगर जिल्हाध्यक्ष नितीन सुरेश दिनकर यांनी ही कारवाई केली आहे. भगत यांनी भारतीय जनता पार्टीच्या पदाधिकारी असताना पक्षशिस्त आणि अनुशासन भंग करणारे कृत्य केल्याचा ठपका ठेवत, त्यांना तात्काळ पक्षातून निष्कासित करण्याची कारवाई करण्यात आली आहे. यासंबंधीचे नितीन दिनकर यांचे अधिकृत पत्र समाज माध्यमांवर वेगाने प्रसारित होत आहे.
मेघा भगत या भारतीय जनता पक्षाच्या माजी नगरसेविका आहेत. मावळत्या (आधीच्या) नगरपालिकेत त्या भाजपच्या एकमेव विरोधी महिला नगरसेविका म्हणून कार्यरत होत्या. त्यांनी आगामी निवडणुकीसाठी उमेदवारीची मागणी पक्षाकडे केली होती.
मात्र, महायुतीच्या स्थानिक नेतृत्वाने ही मागणी डावलली. आमदार अमोल खताळ यांनी नगराध्यक्ष पदासाठी आपल्या भावजयी सुवर्ण खताळ यांची उमेदवारी निश्चित केली. यामुळे नाराज झालेल्या मेघा भगत यांनी पक्षाच्या अधिकृत उमेदवाराविरोधात जात बंडखोरीचा पवित्रा घेतला आणि आपला अपक्ष उमेदवारी अर्ज कायम ठेवला.
खताळ यांच्याकडून उमेदवारी डावलली गेल्याने पक्षांतर्गत अनेक निष्ठावान कार्यकर्त्यांनी आपली नाराजी व्यक्त केली होती. परंतु, थेट पक्षनेतृत्वाला आव्हान देत बंडखोरी करण्याचे मोठे धाडस मेघा भगत यांनी दाखविले.
भगत यांच्या या बंडखोरीचे पडसाद आता पक्षांतर्गत जोरदार उमटले असून, भाजपला शिस्तभंगाच्या कारवाईतून आपला कठोर संदेश द्यावा लागला आहे. या कारवाईमुळे आता संगमनेर नगरपालिकेची निवडणूक अधिकच चुरशीची होणार असल्याचे स्पष्ट झाले आहे.
या घडामोडीवर भाजप आणि बंडखोर उमेदवाराची पुढील प्रतिक्रिया काय असेल, यावर संगमनेरच्या राजकारणात लक्ष लागून राहिले आहे.
रणसंग्राम तापला! भाजपच्या माजी नगरसेविका मेघा भगत यांची बंडखोरी; पक्षाकडून तातडीने निष्कासन!
थेट पक्षनेतृत्वाला आव्हान देत बंडखोरी करण्याचे मोठे धाडस मेघा भगत यांनी दाखविले.
