चेक बाऊन्स प्रकरणात आरोपीला ६ महिने कारावास आणि दुप्पट दंडाची शिक्षा

संगमनेर – संगमनेरच्या श्रीराम फायनान्स लिमिटेडला कर्जाच्या हप्त्यापोटी दिलेला धनादेश (चेक) अनादरीत झाल्याप्रकरणी संगमनेर न्यायालयाने मोठा निर्णय दिला आहे. आरोपी संदीप सावळेराम पगारे (रा. संजयनगर, कोपरगाव) याला सहा महिने साधा कारावास आणि चेक रकमेच्या दुप्पट रक्कम फिर्यादी कंपनीला देण्याची शिक्षा माननीय न्यायाधीश जे. व्ही. भेंडे यांच्या न्यायालयाने ठोठावली आहे.

आरोपी संदीप सावळेराम पगारे यांनी श्रीराम फायनान्स लिमिटेड कंपनीच्या संगमनेर शाखेकडून कर्ज घेतले होते. कर्जाच्या परतफेडीसाठी आरोपीने कंपनीला जो धनादेश दिला होता, तो बँकेत बाऊन्स झाल्यानंतरही आरोपीने कायदेशीर मुदतीत रक्कम परतफेड न केल्यामुळे कंपनीने त्याच्याविरुद्ध न्यायालयात खटला दाखल केला.

या प्रकरणाची सुनावणी चौथे वरिष्ठ व ॲडिशनल मॅजिस्ट्रेट जे. व्ही. भेंडे यांच्या न्यायालयात झाली. गुणदोषांवर निकाल देत न्यायालयाने आरोपीला दोषी ठरवले आणि आरोपीला सहा महिने साधा कारावासाची शिक्षा आणि चेक रकमेच्या दुप्पट रक्कम फिर्यादी कंपनीस एक महिन्याच्या आत अदा करण्याचे आदेश दिले. तसेच आरोपीने विहित मुदतीत दंडाची रक्कम न भरल्यास, त्याला अतिरिक्त तीन महिने साधा कारावास भोगावा लागेल, अशी शिक्षा ठोठावली.

या खटल्यात फिर्यादी कंपनीच्या वतीने ॲड. राजू बबनराव खरे यांनी काम पाहिले. त्यांना ॲड. विजय देवगिरे, ॲड. सुहास गोर्डे आणि ॲड. सुमय्या सय्यद यांनी सहकार्य केले.