संगमनेरच्या संस्कार-बालभवनची राज्यस्तरीय नृत्यस्पर्धेत ऐतिहासिक कामगिरी! लोकनृत्यात सुवर्णपदकासह प्रथम क्रमांक; विविध राज्यातील स्पर्धकांवर वर्चस्व

संगमनेर- 
‘एक भारत, श्रेष्ठ भारत’ या संकल्पनेवर आधारित कल्चर फौंडेशन आयोजित राज्यस्तरीय नृत्यस्पर्धेत संगमनेरच्या संस्कार-बालभवनच्या नृत्यांगणांनी नेत्रदीपक यश संपादन करत स्पर्धेवर आपले वर्चस्व सिद्ध केले. पारंपरिक भारतीय शास्त्रीय आणि लोकनृत्य प्रकारांवर आधारित या स्पर्धेत महाराष्ट्रासह राजस्थान, गुजरात, ओडिशा, केरळ अशा विविध राज्यातील शालेय आणि महाविद्यालयीन स्पर्धकांनी सहभाग घेतला होता.
संगमनेर महाविद्यालयाच्या साईबाबा सभागृहात पार पडलेल्या या प्रतिष्ठेच्या स्पर्धेत, संस्कार-बालभवनची विद्यार्थिनी वेदीका हासे हिने उत्कृष्ट लोकनृत्य सादर करत ज्युनिअर गटात सुवर्णपदकासह पहिला क्रमांक पटकावून संगमनेरचे नाव उंचावले. याव्यतिरिक्त, इतर दोन्ही गटांमध्ये रौप्यपदकासह दुसरे स्थान मिळवत बालभवनच्या विद्यार्थ्यांनी या स्पर्धेतील आपली गुणवत्ता सिद्ध केली.
देशाच्या विविध संस्कृतीचे दर्शन- भारतीय पारंपरिक नृत्य प्रकारांना प्रोत्साहन देण्यासाठी आणि या क्षेत्रातील प्रतिभावंतांना व्यासपीठ मिळवून देण्यासाठी कल्चर फौंडेशनच्यावतीने या राज्यस्तरीय स्पर्धांचे आयोजन करण्यात आले होते. ‘एक भारत – श्रेष्ठ भारत’ अंतर्गत झालेल्या या स्पर्धेत महाराष्ट्रातील अहिल्यानगर, मुंबई, पुणे, नाशिक, अमरावती यांसारख्या महानगरांसह राजस्थान, गुजराथ, ओडिशा, केरळ अशा अनेक राज्यांतून आलेल्या स्पर्धकांनी आपल्या प्रादेशिक संस्कृतीचे आणि परंपरांचे सुंदर प्रतिबिंब नृत्यातून दाखवले.
शास्त्रीय नृत्यातही छाप- लोकनृत्याप्रमाणेच, शास्त्रीय नृत्यप्रकारातही बालभवनच्या नृत्यांगणांनी प्रभावी कामगिरी केली. भरतनाट्यम् या नृत्यप्रकारात, बालभवनच्या संघाने उप-ज्युनिअर आणि ज्युनिअर या दोन्ही गटांमध्ये रौप्यपदकासह दुसरे स्थान मिळवले.✨ उप-ज्युनिअर गट: तृषा वेडे, कृष्णा गुळवे, सिया पाचोरे, देविका टकले, शांभवी कलंत्री.
✨ ज्युनिअर गट: आर्या पाटील, पूर्वा पवार, आदिश्री इंदाणी, उन्नती जैन, आणि मीनल झंवर.
उत्कृष्ट प्रदर्शनाच्या जोरावर या सर्व नृत्यांगणांनी रौप्यपदकावर आपले नाव कोरले.
कल्चर फौंडेशनचे संचालक कुणाल आनंदम् आणि प्रकल्प प्रमुख कुलदीप कागडे यांनी स्पर्धेचे संचालन केले. प्रशिक्षकाची भूमिका विशाल भोकरे आणि सोनाली महापात्रा यांनी यशस्वीपणे पार पाडली. या भरीव यशाबद्दल गीता परिवाराचे राष्ट्रीय कार्याध्यक्ष डॉ. संजय मालपाणी, बालभवनच्या संचालिका अनुराधा मालपाणी आणि सचिव गिरीश डागा यांनी सर्व नृत्यांगणांचे आणि प्रशिक्षकांचे अभिनंदन केले आहे.