संगमनेर, प्रतिनिधी –
संगमनेर तालुक्यातील जवळे कडलग येथे चार वर्षांच्या मुलावर हल्ला करणाऱ्या बिबट्याला अखेर वनविभागाच्या रेस्क्यू टीमने जेरबंद केले आहे. शनिवारी (दि. १३) या बिबट्याच्या हल्ल्यात सिध्देश कडलग या लहानग्याचा दुर्दैवी मृत्यू झाला होता. संतप्त ग्रामस्थांच्या तीव्र आंदोलनामुळे वनविभागाने तातडीने शोधमोहीम सुरू केली होती आणि अखेर रविवारी (दि. १४) दुपारी साडेबारा वाजण्याच्या सुमारास हा बिबट्या जाळ्यात अडकला.
शनिवारी बिबट्याने हल्ला करून सिध्देशचा बळी घेतल्यामुळे जवळे कडलगसह संपूर्ण तालुक्यात संतापाची लाट उसळली होती. बिबट्याला ठार मारल्याशिवाय मृतदेह ताब्यात घेणार नाही, अशी आक्रमक भूमिका ग्रामस्थांनी घेतल्याने परिसरात तणावपूर्ण वातावरण निर्माण झाले होते. यामुळे रेस्क्यू टीमसह मोठा पोलीस बंदोबस्त तैनात करण्यात आला होता.
घटनेचे गांभीर्य लक्षात घेऊन नाशिक तसेच नागपूर येथील मुख्य वनसंरक्षकांनी संगमनेरच्या वनविभागाला तातडीने बिबट्याला पकडण्याचे आदेश दिले. ग्रामस्थांच्या सहकार्याने शोध मोहीम तीव्र करण्यात आली. शनिवारी रात्री ड्रोनच्या साहाय्याने बिबट्याचा शोध सुरू होता. रात्रभर आणि रविवारी सकाळीही शोध घेतल्यानंतर पायाचे ठसे आणि ड्रोनच्या निरीक्षणातून बिबट्या नदीच्या परिसरात असल्याची माहिती मिळाली.
रेस्क्यू टीमने तातडीने घटनास्थळी धाव घेत बिबट्याला घेरले. सावज टप्प्यात येताच बेशुद्धीचे इंजेक्शन (Dart) मारून बिबट्याला पकडण्यात वन विभागाच्या टीमला मोठे यश आले. पकडलेला बिबट्या दोन ते तीन वर्षे वयाचा असून, तो नर जातीचा आहे. त्याला पिंजऱ्यात ठेवून सध्या रोपवाटिकेत ठेवण्यात आले आहे.
सहाय्यक वनरक्षक अमरजीत पवार यांनी माहिती दिली की, नागपूर येथील मुख्य वनसंरक्षकांनी बिबट्याला ठार मारण्याची परवानगी दिली होती. मात्र, परवानगी मिळण्यापूर्वीच तो पकडण्यात आला आहे.
बिबट्या पकडला असला तरी नागरिकांमध्ये भीतीचे वातावरण कायम आहे. तसेच, पकडलेला बिबट्या सिध्देशवर हल्ला करणारा तोच आहे का, याबाबत ग्रामस्थांमध्ये संभ्रम आहे. वैद्यकीय तपासणीनंतर याची निश्चिती होणार आहे. वनक्षेत्रपाल सागर केदार यांनी दिलेल्या माहितीनुसार, धोका टाळण्यासाठी जवळे कडलग परिसरात इतरही बिबट्यांचा शोध घेण्यासाठी मोहीम रविवारी दिवसभर आणि रात्रीही सुरू होती. ही शोध मोहीम सोमवारी रात्रीही सुरू ठेवण्यात आली आहे.
🌟 अहिल्यानगर जिल्ह्याचे पालकमंत्री राधाकृष्ण विखे पाटील यांनी नागपूरच्या मुख्य वनसंरक्षकांशी चर्चा करून बिबट्याला ठार मारण्याची परवानगी मिळवल्याचे सांगितले.
🌟 माजी मंत्री बाळासाहेब थोरात यांनीही वनमंत्र्यांशी फोनवर चर्चा करून घटनेचे गांभीर्य लक्षात आणून दिल्याचे आणि त्यामुळे परवानगी मिळाल्याचे सांगितले.
🌟 आमदार अमोल खताळ यांनी आपण पालकमंत्री, वनमंत्री व संबंधितांशी चर्चा करून बिबट्याला ठार मारण्याची विनंती केली होती, त्यानुसार परवानगी मिळाल्याचे स्पष्ट केले.
