शिक्षणाची नवी क्रांती! लोकनेते बाळासाहेब थोरात यांच्या संकल्पनेतून ९ अद्यावत अभ्यासिका साकारणार, राजापूर येथे डॉ. जयश्रीताई थोरात यांच्या हस्ते अभ्यासिकेचे भूमिपूजन; वाचन संस्कृती आणि करिअरला मिळणार बळ

संगमनेर | महाराष्ट्र संवाद न्यूज

सहकार, शेती, शिक्षण आणि ग्रामीण अर्थव्यवस्थेत ‘संगमनेर मॉडेल’ राज्यासमोर ठेवणारे माजी महसूलमंत्री लोकनेते बाळासाहेब थोरात यांनी आता ग्रामीण भागातील विद्यार्थ्यांच्या उज्ज्वल भविष्यासाठी एक महत्त्वाकांक्षी पाऊल उचलले आहे. तालुक्यातील युवकांना स्पर्धा परीक्षा व उच्च शिक्षणासाठी हक्काची जागा मिळावी, या उद्देशाने ९ अद्यावत अभ्यासिका उभारण्याची संकल्पना त्यांनी मांडली आहे. 

या उपक्रमाचा शुभारंभ म्हणून राजापूर येथे ग्रामविकास २५१५ अंतर्गत सार्वजनिक बांधकाम विभागाच्या वतीने ३० लाख रुपये निधीतून साकारल्या जाणाऱ्या अभ्यासिकेचे भूमिपूजन युवक काँग्रेसच्या अध्यक्ष डॉ. जयश्रीताई थोरात यांच्या हस्ते उत्साहात संपन्न झाले.

डॉ. जयश्रीताई थोरात म्हणाल्या की, यशवंतराव चव्हाण यांचे समृद्ध वारसदार ही ओळख जपत लोकनेते बाळासाहेब थोरात यांनी संगमनेर तालुक्याला विकासाच्या प्रत्येक क्षेत्रात आदर्श बनवले आहे. आज संगमनेर हे अद्यावत शिक्षणाचे केंद्र बनले असून, ग्रामीण भागातील मुला-मुलींना स्पर्धा परीक्षांच्या अभ्यासासाठी शहरात जावे लागू नये, यासाठी ही ‘अद्यावत अभ्यासिका’ संकल्पना राबवण्यात येत आहे. 

तालुक्यातील नऊ महत्त्वाच्या गावांमध्ये या अभ्यासिकांचे काम सुरू होणार असून, राजापूर येथील केंद्रामुळे परिसरातील अनेक विद्यार्थ्यांची मोठी सोय होणार आहे. यामुळे युवकांमध्ये वाचन संस्कृती वाढण्यास आणि त्यांच्या करिअरला नवी दिशा मिळण्यास मदत होईल, असा विश्वासही त्यांनी व्यक्त केला.

कार्यक्रमात बोलताना रामहरी कातोरे यांनी सांगितले की, शिक्षणातूनच समृद्धी येते आणि हीच दृष्टी समोर ठेवून लोकनेते थोरात यांनी विविध शैक्षणिक सुविधा निर्माण केल्या आहेत. डॉ. जयश्रीताई थोरात यांच्या संकल्पनेतून सध्या ‘यशोधन’ जनसंपर्क कार्यालय येथेही अद्यावत लायब्ररी सुरू असून, ग्रामीण विद्यार्थ्यांनी या संधीचा लाभ घेण्याचे आवाहन त्यांनी केले.

या भूमिपूजन प्रसंगी रामहरी कातोरे, संतोष हासे, माधव हासे, लतिका गायकर, कुसुमताई पानसरे, बाबासाहेब गायकर, सोमनाथ हासे, संजय हासे, प्रदीप हासे, अजय हासे, रावसाहेब खतोडे, राजेंद्र खैरनार, विनीत खतोडे, रमेश जाधव, शैला हासे, राजश्री घोलप, जयश्री हासे, मनीषा हासे, देवराम हासे, आनंदा हासे, प्रशांत तिकांडे, बाळासाहेब बर्डे, भास्कर मोहिते, अविनाश शेलकर, भारत हासे, सुशांत हासे, राहुल गायकर, संभाजी हासे, विकास हासे, अमोल साळुंके यांच्यासह परिसरातील नागरिक, महिला व युवक कार्यकर्ते मोठ्या संख्येने उपस्थित होते. कार्यक्रमाचे प्रास्ताविक प्रदीप हासे यांनी केले तर आभार रावसाहेब खतोडे यांनी मानले.