संगमनेर | महाराष्ट्र संवाद न्यूज
संगमनेर शहरात नगरपरिषद निवडणुकीच्या विजयाचा जल्लोष सुरू असतानाच भारतनगर भागात दहशतीचे वातावरण निर्माण झाले.नवनिर्वाचित विजयी सदस्य नूर महंमद शेख यांची मिरवणूक सुरू असताना एका कुटुंबावर लोखंडी रॉड, चॉपर आणि बेसबॉल स्टिकने जीवघेणा हल्ला करण्यात आला. या खळबळजनक घटनेमुळे शहरात तणावाचे वातावरण असून, संगमनेर शहर पोलिसांनी याप्रकरणी १७ जणांविरुद्ध गुन्हा दाखल केला आहे.
मिळालेल्या माहितीनुसार,२२ डिसेंबर २०२५ रोजी रात्री ९:३० च्या सुमारास फिर्यादी रिक्षा चालक मुजीब शमशुद्दीन शेख (वय ४०, रा. भारतनगर, संगमनेर) हे आपल्या घरी असताना, यावेळी नवनिर्वाचित विजयी उमेदवार नूर महंमद शेख यांची मिरवणूक या भागातून जात होती. मिरवणूक फिर्यादींच्या घरासमोर आली असता, आरोपींनी अचानक घोषणाबाजी करत फिर्यादीला लक्ष केले.
इनको बाहर खिचो और मारो अशा चिथावणीखोर घोषणा देत आरोपींच्या टोळक्याने फिर्यादी मुजीब शेख, तसेच जोया, मेहरान, इशज आणि साद यांना घेराव घातला. हातातील लोखंडी रॉड, बेसबॉल स्टिक आणि धारदार चॉपरने फिर्यादी व त्यांच्या नातेवाईकांना बेदम मारहाण करण्यात आली. या हल्ल्यात फिर्यादी गंभीर जखमी झाले असून, त्यांना तातडीने संगमनेर येथील खासगी हॉस्पिटलमध्ये उपचारासाठी दाखल करण्यात आले आहे.
या १७ आरोपींवर गुन्हे दाखल-मुजीब शेख यांनी दिलेल्या फिर्यादीवरून पोलिसांनी खालील १७ जणांविरुद्ध गुन्हे दाखल केले असून यात सलीम हाजी शेख, नूर मोहम्मद शेख, इमरान गणी शेख, शैजाज सलीम शेख, दानिश सलीम शेख, सलमान सलीम शेख, वसीम अब्दुल रहमान शेख, उमेर अलीम हाजी, जमील अजीज पठाण, ययाखान समशेरखान पठाण, अदनान शाहिद शेख, जिशान शाहिद शेख, सरजील मोहम्मद शेख, अलीम हाजी शेख, नईम रहमान शेख, तलहा कलीम शेख व रिजवान उस्मान शेख यांचा आरोपींमध्ये समावेश आहे.
पोलीस प्रशासनाची भूमिका- घटनेची गांभीर्य ओळखून उपविभागीय पोलीस अधिकारी डॉ. कुणाल सोनवणे, संगमनेर शहर पोलीस ठाण्याचे पोलीस निरीक्षक समीर बारवकर, पोलीस उपनिरीक्षक श्रीकांत सावंत यांनी घटनास्थळी भेट देऊन परिस्थिती हाताळली. या प्रकरणाचा तपास सहाय्यक पोलीस निरीक्षक मोरे यांच्याकडे सोपवण्यात आला आहे. पोलिसांनी आरोपींविरुद्ध गुन्हा रजिस्टर नंबर ११०१/२०२५ बी.एन.एस. कलम ११८, १९१(१), १९१(२), १९१(३), ३५१(२) आणि महाराष्ट्र पोलीस अधिनियम ३७(१), (३) नुसार गुन्हे नोंदवले आहेत.
