संगमनेरात ध्रुव ग्लोबल स्कूलच्या सांस्कृतिक महोत्सवात रंगणार मेवाडची शौर्यगाथा!

संगमनेर (प्रतिनिधी):
मालपाणी फाऊंडेशन संचलित ध्रुव ग्लोबल स्कूलने आपल्या वार्षिक सांस्कृतिक महोत्सवाची परंपरा जपत यावर्षी मेवाडच्या गौरवशाली इतिहासावर आधारित भव्य ऐतिहासिक महानाट्याचे आयोजन केले आहे. शनिवार, २७ डिसेंबर रोजी सायंकाळी ७:३० वाजता मालपाणी लॉन्स येथे हा प्रेरणादायी सोहळा पार पडणार असून, यामध्ये शाळेच्या माध्यमिक विभागातील ३०० हून अधिक विद्यार्थी सहभागी होणार आहेत.
या महानाट्याच्या माध्यमातून परकीय आक्रमकांना तब्बल तीन शतके रोखून धरणारे बाप्पा रावल यांच्यापासून ते अटकेपार झेंडा फडकवणारे महापराक्रमी महाराणा प्रताप यांच्या जीवनचरित्रावर प्रकाश टाकला जाणार आहे. प्रेक्षकांना यावेळी राणी पद्मिनीचा ऐतिहासिक जोहर, वीर गोरा आणि बादल यांचे अचाट शौर्य, पन्नादाईंचा सर्वोच्च त्याग आणि दानशूर भामाशाह यांच्या दातृत्वाची गाथा प्रत्यक्ष रंगमंचावर अनुभवता येईल.
इयत्ता सहावी ते बारावीचे विद्यार्थी आपल्या प्रभावी संवादातून आणि बहारदार नृत्यातून हा इतिहास जिवंत करणार आहेत. हा कार्यक्रम केवळ मनोरंजन नसून भावी पिढीला आपल्या देदिप्यमान इतिहासाची ओळख करून देणारा एक संस्काराचा भाग आहे. तरी संगमनेरकर नागरिकांनी या ऐतिहासिक अनुभवासाठी वेळेवर उपस्थित राहावे, असे आवाहन ध्रुव ग्लोबल स्कूलच्या वतीने करण्यात आले आहे.