घारगाव (अहिल्यानगर)-
संगमनेर तालुक्यातील जांबूत खुर्द येथे एका गर्भवती महिलेचा अपमान करून तिला जातिवाचक शिवीगाळ केल्याची आणि तिच्या पतीला मारहाण केल्याची संतापजनक घटना घडली आहे. या प्रकरणी घारगाव पोलिसांनी दोन सख्ख्या भावांविरुद्ध अ‍ॅट्रॉसिटी कायद्यासह भारतीय न्याय संहितेच्या विविध कलमांनुसार गुन्हा दाखल केला आहे.
फिर्यादीत नमूद केल्यानुसार, दि. २ जानेवारी २०२६ रोजी दुपारी १ वाजेच्या सुमारास फिर्यादी महिला शेतातून घरी परतत असताना, आरोपी दस्तगीर शब्बीर पठाण याने त्यांना रस्त्यात अडवले. यावेळी आरोपीने महिलेच्या चारित्र्यावर संशय घेणारे आक्षेपार्ह वक्तव्य करून तिला लज्जा वाटेल असे कृत्य केले. इतकेच नव्हे तर, पीडित महिला ही अनुसूचित जमातीची असल्याचे माहित असतानाही तिला जातीवरून हीन वागणूक देत जातिवाचक शिवीगाळ करण्यात आली.
या घटनेची माहिती महिलेने आपल्या पतीला दिल्यानंतर, तिचे पती संबंधित आरोपीला जाब विचारण्यासाठी गेले होते. त्यावेळी आरोपी दस्तगीर शब्बीर पठाण आणि त्याचा भाऊ समीर शब्बीर पठाण या दोघांनी मिळून त्यांना लाथाबुक्क्यांनी बेदम मारहाण केली. “तुमच्या XXXX मी बघून घेतो, तुम्हाला काय करायचे ते करून घ्या, मी कुणालाही घाबरत नाही,” अशी धमकी देऊन आरोपींनी परिसरात दहशत निर्माण केली.
या घटनेनंतर पीडित महिलेने ५ जानेवारी रोजी घारगाव पोलीस ठाण्यात धाव घेऊन तक्रार दिली. पोलिसांनी या तक्रारीची गंभीर दखल घेत आरोपींविरुद्ध अ‍ॅट्रॉसिटी कायद्याच्या कलम ३(१)(r), ३(१)(s), ३(१)(w)(i), ३(२)(va) तसेच भारतीय न्याय संहितेच्या कलम ७४ आणि ३५१(२) अन्वये गुन्हा नोंदवला आहे. या प्रकरणाचा पुढील तपास पोलीस उपअधीक्षक डॉ. कुणाल सोनवणे हे करत आहे.
