संगमनेर, प्रतिनिधी-
तालुक्यातील शिबलापूर ग्रामपंचायतीचा अत्यंत बेजबाबदार आणि संतापजनक प्रकार उघडकीस आला आहे. गावाच्या स्वच्छतेसाठी शासनाकडून आलेली लाखो रुपयांची घंटागाडी गेल्या चार वर्षांपासून एका गोदामात सडत पडली असतानाच, याच गोदामात आपल्या देशाच्या महापुरुषांचे फोटो अत्यंत विदारक आणि अपमानस्पद अवस्थेत फेकल्याचे समोर आले आहे. थेट व्हिडिओ पुराव्यामुळे ग्रामपंचायत प्रशासनाच्या मनमानी कारभाराचे वाभाडे निघाले असून संपूर्ण तालुक्यातून संतापाची लाट उसळली आहे.
गावातील घरोघरी जाऊन कचरा संकलित करण्यासाठी जिल्हा परिषद गटाच्या माध्यमातून शिबलापूर गावाला लाखो रुपये किमतीची घंटागाडी देण्यात आली होती. मात्र, ग्रामपंचायत प्रशासनाच्या नाकर्तेपणामुळे ही गाडी नागरिकांच्या सेवेत येण्याऐवजी एका खासगी गोदामाची शोभा वाढवत आहे. गावात कचऱ्याचे साम्राज्य पसरलेले असताना सरकारी मालमत्तेची अशी नासधूस होत असल्याने ग्रामस्थांमधून तीव्र संताप व्यक्त होत आहे.
या प्रकरणातील सर्वात धक्कादायक आणि क्लेशदायक बाब म्हणजे, ज्या गोदामात ही कचरा गाडी उभी आहे, तिथेच राष्ट्रपुरुष आणि महापुरुषांच्या तसबिरी (फोटो फ्रेम) अत्यंत अपमानस्पदरित्या अस्ताव्यस्त फेकलेल्या अवस्थेत आढळल्या. एकेकाळी भिंतीवर अभिमानाने असणारे हे फोटो आज जमिनीवर धुळीत पडलेले पाहून शिवप्रेमी आणि ग्रामस्थांच्या भावना प्रचंड दुखावल्या आहेत. ही केवळ प्रशासकीय चूक नसून महापुरुषांची मोठी विटंबना असल्याचे बोलले जात आहे.
काही सुज्ञ नागरिकांनी जेव्हा या बेजबाबदार कारभाराबाबत ग्रामपंचायत प्रशासनाला विचारणा केली, तेव्हा त्यांना उत्तरे देण्याऐवजी प्रशासनाकडून अरेरावीची भाषा वापरण्यात आली. हे गंभीर प्रकरण दडपून टाकण्याचा प्रयत्न झाला असला, तरी सतर्क नागरिकांनी केलेल्या चित्रीकरणामुळे हा सर्व काळा कारभार आता चव्हाट्यावर आला आहे. या व्हिडिओमध्ये कचरा गाडीची दुरवस्था आणि महापुरुषांच्या फोटोंची झालेली विटंबना स्पष्टपणे दिसून येत आहे.
ज्या महापुरुषांच्या नावावर मते मागितली जातात, त्यांचेच फोटो गोदामात कचऱ्यासारखे फेकून देणाऱ्यांना खुर्चीवर बसण्याचा अधिकार आहे का, असा सवाल आता उपस्थित केला जात आहे. या प्रकरणाची गांभीर्याने दखल घेऊन गटविकास अधिकारी (BDO) आणि जिल्हा परिषद मुख्य कार्यकारी अधिकारी यांनी तातडीने चौकशी करावी, तसेच संबंधित ग्रामसेवक व जबाबदार पदाधिकाऱ्यांवर निलंबनाची कारवाई करून गुन्हे दाखल करावेत, अशी आग्रही मागणी होत आहे.
