‘थोरात-तांबे’ गटाची मोहोर उमटलेल्या संगमनेर नगरपरिषदेच्या उपनगराध्यक्षपदी नूरमोहम्मद शेख तर स्वीकृतच्या माध्यमातून मालपाणी परिवाराची सत्तेत एन्ट्री, रचना मालपाणी, सोमेश्वर दिवटे आणि जावेद पठाण स्वीकृत नगरसेवक!

संगमनेर | अनंत पांगारकर
संगमनेर नगरपरिषदेच्या निवडणुकीत ऐतिहासिक विजय मिळवल्यानंतर, शहराच्या विकासकामांना गती देण्यासाठी आता नव्या कारभाऱ्यांची अधिकृत घोषणा करण्यात आली आहे. नगराध्यक्ष डॉ. मैथिली तांबे यांच्या टीम मध्ये ‘संगमनेर सेवा समिती’चे नूरमोहम्मद शेख यांची उपनगराध्यक्षपदी निवड करण्यात आली असून, स्वीकृत नगरसेवक म्हणून रचना मालपाणी, सोमेश्वर दिवटे आणि जावेद पठाण यांच्या नावावर शिक्कामोर्तब झाले आहे. नगराध्यक्ष डॉ. मैथिली तांबे यांच्या अध्यक्षतेखाली मंगळवारी पालिकेच्या रामकृष्ण सभागृहात पार पडलेल्या विशेष सभेत हे निर्णय घेण्यात आले.
विकासाचा नवा फॉर्म्युला आणि ‘संगमनेर २.०’ व्हिजन – माजी मंत्री बाळासाहेब थोरात आणि आमदार सत्यजित तांबे यांनी या निवडी करताना शहराच्या सर्वांगीण विकासाचे ‘व्हिजन’ समोर ठेवले आहे. आमदार सत्यजित तांबे यांनी निवडणुकीपूर्वीच ‘संगमनेर २.०’ हा जाहीरनामा मांडला होता, त्याचीच अंमलबजावणी या निवडींमधून होताना दिसत आहे. विशेषतः सामाजिक आणि उद्योजकता क्षेत्रात मोठे नाव असलेल्या मालपाणी परिवारातील रचना मालपाणी यांना सत्तेत सहभागी करून घेतल्याने, शहराच्या नियोजनाला आता कॉर्पोरेट आणि सामाजिक कार्याचा नवा आयाम मिळणार असल्याचे मानले जात आहे.
विरोधकांचे पानिपत आणि सेवा समितीचे वर्चस्व – नुकत्याच झालेल्या नगर परिषद निवडणुकीत थोरात-तांबे आणि खताळ-विखे यांची प्रतिष्ठा पणाला लागली होती. मात्र, सेवा समितीने २८ पैकी तब्बल २७ जागा जिंकत विरोधकांना जोरदार धक्का दिला. विशेष म्हणजे, एकेकाळी पालिकेत प्रभाव असलेल्या भारतीय जनता पक्षाला या निवडणुकीत एकाही जागेवर खाते उघडता आले नाही. महायुतीकडून केवळ शिवसेनेची एक महिला उमेदवार निवडून येऊ शकली, तर नगराध्यक्षपदाच्या निवडणुकीत डॉ. मैथिली तांबे यांनी सुवर्णा खताळ यांचा १६ हजारांहून अधिक मताधिक्याने पराभव करून राज्यात आपला दबदबा निर्माण केला.
इच्छुकांची गर्दी अन् तांबे यांचा समतोल- एकहाती बहुमत मिळाल्याने उपनगराध्यक्ष आणि स्वीकृत पदांसाठी इच्छुकांची संख्या मोठी होती, यामुळे नेत्यांचा मोठा कस लागला. मात्र, आमदार सत्यजित तांबे यांनी सर्वसमावेशक फॉर्म्युला ठरवत नूरमोहम्मद शेख यांच्या रूपाने अल्पसंख्याक समाजाला, तर दिवटे यांच्या रूपाने अनुभवी आणि पठाण यांच्या रूपाने निष्ठावान कार्यकर्त्यांना न्याय दिला आहे. या निवडी जाहीर होताच पालिकेच्या प्रांगणात कार्यकर्त्यांनी गुलालाची उधळण करत मोठा जल्लोष केला.
आता या नवीन ‘टीम संगमनेर’ कडून शहरवासीयांना मोठ्या अपेक्षा असून, डॉ. मैथिली तांबे यांच्या नेतृत्वाखाली ही टीम संगमनेरच्या विकासाचा कोणता नवा टप्पा गाठते, आणि यात मालपाणी परिवार काय योगदान देते याकडे सर्वांचे लक्ष लागले आहे.