संगमनेर, प्रतिनिधी-
येथील प्रतिष्ठित व्यापारी शैलेश पारख यांची कन्या कुमारी हर्षा पारख हिने संसारातील भौतिक सुखांचा त्याग करून संयम, तप आणि साधनेचा मार्ग स्वीकारण्याचा दृढ निर्णय घेतला आहे. येत्या २५ जानेवारी २०२६ रोजी संगमनेर येथे तिचा भव्य व ऐतिहासिक जैन भागवती दीक्षा महोत्सव मोठ्या उत्साहात संपन्न होणार आहे.
या पावन प्रसंगी जैन श्रमण संघाचे अर्हम विज्जा प्रणेते उपाध्याय प्रवर प्रवीण ऋषी महाराज हे चतुर्विध संघाच्या साक्षीने हर्षा पारख यांना भागवती दीक्षा प्रदान करणार आहेत. या सोहळ्यासाठी जैन धर्मातील प्रख्यात संत वाणीचे जादूगर रमणिक मुनीजी महाराज, मधुर कंठी तीर्थेश ऋषीजी महाराज, सरलमना अचल ऋषीजी महाराज आणि कैवल्यधाम प्रेरक कैवल्य रत्नाश्री महाराज उपस्थित राहणार आहेत.
तसेच प.पू. विभक्ती श्रीजी महाराज, प.पू. विचक्षणाजी महाराज, प.पू. करुणाजी महाराज, प.पू. पुण्यशीलाजी महाराज, प.पू. ज्ञानप्रभाजी महाराज व प.पू. हिमानीजी महाराज यांच्यासह अनेक साधू-साध्वींचे संगमनेरमध्ये मंगल आगमन होणार आहे. सध्या या महोत्सवाच्या निमित्ताने नगरीत भक्तीमय वातावरण असून, मधुर वक्ता व अनुशासनप्रिय प.पू. सम्यकदर्शनाजी महाराज (आदि ठाणा ३), ज्ञान आराधिका प.पू. डॉ. श्री प्रणवदर्शनाजी महाराज आणि मधुर वक्ता प.पू. श्री ईशदर्शनाजी महाराज (आदि ठाणा २) यांचे सान्निध्य भाविकांना लाभत आहे.
या अभूतपूर्व धार्मिक सोहळ्याला राज्यभरातून मोठ्या संख्येने जैन बांधवांनी उपस्थित राहावे, असे आवाहन श्री वर्धमान स्थानकवासी जैन श्रावक संघ, जैन सोशल लेडीज ग्रुप व जैन युथ फेडरेशन, संगमनेर यांच्या वतीने करण्यात आले आहे.
