संगमनेर, प्रतिनिधी –
संगमनेर शहर आणि तालुक्याच्या औद्योगिक तसेच आर्थिक विकासाला मोठी चालना देणाऱ्या ‘अत्याधुनिक ट्रक टर्मिनस’चे काम सध्या प्रगतीपथावर आहे. संगमनेर नगरपालिकेच्या माध्यमातून तब्बल ७.५ कोटी रुपयांच्या निधीतून हे भव्य टर्मिनस साकारले जात असून, अशा प्रकारच्या अत्याधुनिक सोयी-सुविधा असणारे हे महाराष्ट्रातील कोणत्याही तालुक्यातील पहिलेच ट्रक टर्मिनस ठरणार असल्याची माहिती नगराध्यक्ष डॉ. मैथिली तांबे यांनी दिली.
आज आमदार सत्यजीत तांबे यांच्यासोबत या ट्रक टर्मिनसच्या कामाची प्रत्यक्ष पाहणी करण्यात आली. यावेळी संबंधित अधिकारी, परिसरातील ग्रामस्थ, ट्रान्सपोर्ट क्षेत्रातील नामवंत व्यावसायिक आणि अनेक मान्यवर उपस्थित होते. या प्रकल्पाच्या माध्यमातून संगमनेरच्या व्यापार आणि दळणवळण क्षेत्राला एक नवी ओळख मिळणार आहे.
यावेळी बोलताना नगराध्यक्ष डॉ. मैथिली तांबे म्हणाल्या की, संगमनेरचा औद्योगिक विस्तार झपाट्याने होत असून येथील वाढत्या वाहतुकीचे नियोजन करणे आवश्यक होते. याच उद्देशातून आम्ही ७.५ कोटी रुपयांचा निधी उपलब्ध करून या टर्मिनसचे काम हाती घेतले आहे. या प्रकल्पामुळे शहरातील वाहतूक कोंडीची समस्या सुटण्यास मदत होईलच, शिवाय ट्रान्सपोर्ट व्यावसायिकांना एकाच छताखाली सर्व अत्याधुनिक सुविधा उपलब्ध होतील. अशा स्वरूपाचे आधुनिक टर्मिनस महाराष्ट्रात अन्य कुठेही तालुक्याच्या ठिकाणी पाहायला मिळत नाही, हे संगमनेरसाठी भूषणावह आहे.
आमदार सत्यजीत तांबे यांनी यावेळी कामाच्या प्रगतीचा आढावा घेतला आणि गुणवत्तापूर्ण कामाबाबत समाधान व्यक्त केले. या ट्रक टर्मिनसमुळे संगमनेरच्या औद्योगिक आणि आर्थिक विकासाला खऱ्या अर्थाने गती मिळणार असून, यामुळे स्थानिकांसाठी रोजगाराच्या नवीन संधी उपलब्ध होणार आहेत. ट्रान्सपोर्ट क्षेत्रातील जाणकारांनीही या उपक्रमाचे स्वागत केले असून, यामुळे भविष्यात संगमनेर हे एक मोठे ‘लॉजिस्टिक हब’ म्हणून नावारूपाला येईल, असा विश्वास व्यक्त केला जात आहे.
संगमनेरच्या आर्थिक क्रांतीला मिळणार बळ; ७.५ कोटींचे ‘अत्याधुनिक ट्रक टर्मिनस’ प्रगतीपथावर! नगराध्यक्ष डॉ. मैथिली तांबे यांची माहिती; आमदार सत्यजीत तांबे यांच्या उपस्थितीत कामाची पाहणी
संगमनेरचा औद्योगिक विस्तार झपाट्याने होत असून येथील वाढत्या वाहतुकीचे नियोजन करणे आवश्यक होते. याच उद्देशातून आम्ही ७.५ कोटी रुपयांचा निधी उपलब्ध करून या टर्मिनसचे काम हाती घेतले आहे
