संगमनेर – अनंत पांगारकर
संगमनेर नगरपालिकेचा कारभार संगमनेर सेवा समितीच्या हाती गेल्यानंतर नगराध्यक्षा डॉ. मैथिली तांबे आणि उपनगराध्यक्ष नूर मोहम्मद शेख यांनी पदभार स्वीकारून कामकाजाला सुरुवात केली आहे. याच पार्श्वभूमीवर सोमवारी पालिकेच्या विविध विषय समित्यांच्या सभापती आणि सदस्यांची घोषणा करण्यात आली. यामध्ये सत्ताधारी सेवा समितीच्या नगरसेवकांना सभापती पदाची संधी देतानाच, दोन अपक्ष आणि शिवसेनेच्या महिला उमेदवारालाही समित्यांमध्ये स्थान देऊन सर्वसमावेशक कारभाराचे संकेत देण्यात आले आहेत.
सोमवारी तहसीलदार धीरज मांजरे यांच्या अध्यक्षतेखाली पालिकेच्या रामकृष्ण सभागृहात नवनिर्वाचित नगरसेवकांची बैठक पार पडली. यावेळी नगराध्यक्षा डॉ. मैथिली तांबे, उपनगराध्यक्ष नूर मोहम्मद शेख आणि मुख्याधिकारी दयानंद गोरे उपस्थित होते. या बैठकीत सर्व निवडी बिनविरोध करण्यात आल्या.
अशा आहेत नवनियुक्त समित्या:
नगरपालिकेच्या अत्यंत महत्त्वाच्या मानल्या जाणाऱ्या स्थायी समितीच्या पदसिद्ध सभापती पदी नगराध्यक्षा डॉ. मैथिली तांबे यांची निवड झाली असून, सदस्य म्हणून शेख नूरमोहम्मद, किशोर पवार, अनुराधा सातपुते, सरोजना पगडाल, किशोर टोकसे, मुजीब पठाण खान, डॉ. दानिशखान पठाण, दिलीप पुंड व विश्वास मुर्तडक यांचा समावेश आहे.
सार्वजनिक बांधकाम समितीच्या सभापती पदी किशोर हिरालाल पवार यांची निवड झाली असून या समितीत सौरभ कासार, गजेंद्र अभंग, गणेश गुंजाळ, अमजदखान पठाण, शैलेश कलंत्री, नंदा गरुडकर, योगेश जाजू व साक्षी सूर्यवंशी हे सदस्य म्हणून काम पाहतील.
शिक्षण समितीच्या सभापती पदी अनुराधा सातपुते यांची वर्णी लागली असून सीमा खटाटे, वनिता गाडे, गणेश गुंजाळ, प्रियांका शाह, नंदा गरुडकर, शेख दिलशाद, रचना मालपाणी व साक्षी सूर्यवंशी यांची सदस्य म्हणून निवड करण्यात आली आहे.
स्वच्छता वैद्यक आणि सार्वजनिक आरोग्य समितीच्या सभापती पदाची जबाबदारी किशोर टोकसे यांच्याकडे सोपवण्यात आली असून प्रियांका शाह, शैलेश कलंत्री, सीमा खटाटे, सौरभ कासार, शोभा पवार, अमजदखान पठाण, जावेद खान पठाण व साक्षी सूर्यवंशी हे या समितीचे सदस्य असतील.
पाणीपुरवठा आणि जलनिस्सारण समितीच्या सभापती पदी मुजीबखान पठाण यांची निवड झाली असून सदस्य म्हणून भारत बोऱ्हाडे, अर्चना दिघे, शोभा पवार, मालती डाके, नितीन अभंग, विजया गुंजाळ, सोमेश्वर दिवटे व साक्षी सूर्यवंशी यांचा समावेश आहे.
महिला व बालकल्याण समितीच्या सभापती पदी सरोजना पगडाल तर उपसभापती पदी प्रिया काशीद यांची निवड झाली आहे. या समितीमध्ये अर्चना दिघे, वनिता गाडे, दिपाली पंचारिया, विजया गुंजाळ, शकीला बेग, रचना मालपाणी व साक्षी सूर्यवंशी हे सदस्य असतील.
नियोजन आणि विकास समितीचे पदसिद्ध सभापती उपनगराध्यक्ष नूरमोहम्मद शेख असून भारत बोऱ्हाडे, गजेंद्र अभंग, मालती डाके, नितीन अभंग, दिपाली पंचारिया, योगेश जाजू, जावेद खान पठाण व साक्षी सूर्यवंशी यांची सदस्य म्हणून निवड करण्यात आली आहे.
दरम्यान पालिकेतील विरोधी शिवसेना पक्षाच्या एकमेव नगरसेविका साक्षी सूर्यवंशी यांना देखील विविध समित्यांमध्ये संधी दिल्याची माहिती शिवसेनेचे शहर प्रमुख आणि सूर्यवंशी यांचे पती विनोद सूर्यवंशी यांनी महाराष्ट्र संवाद न्यूज शी बोलताना सांगितले.
⏩ प्रशासनाचा ‘गहाळपणा’ चव्हाट्यावर – निवडीची प्रक्रिया पार पडली असली तरी, प्रशासनाच्या कामातील ढिसाळपणा या पहिल्याच बैठकीत समोर आला. सकाळी ११ वाजता सुरू झालेली ही बैठक दुपारी उशिरापर्यंत चालली. मात्र, निवडी जाहीर झाल्यानंतर सायंकाळी उशिरापर्यंत वृत्त प्रसिद्ध करेपर्यंत संबंधित अधिकारी किंवा पदाधिकाऱ्यांकडून अधिकृत यादी माध्यमांना देण्यात आली नाही. वारंवार मागणी करूनही “यादी तयार नाही” असे उत्तर मीटिंग लिपिकाकडून मिळाले. नंतर मात्र लिपिक पठाण यांनी फोन घेण्याचे देखील टाळले. पालिकेतील प्रशासक राज संपून नवीन लोकप्रतिनिधी आले असले तरी, प्रशासकीय कार्यपद्धतीत अद्याप सुधारणा झालेली नसल्याची चर्चा या निमित्ताने रंगली आहे.
