संगमनेरमध्ये वाळू तस्करांवर महसूलचा सर्जिकल स्ट्राईक; २० लाखांचे पोकलंड जप्त, आरोपी फरार

संगमनेर, प्रतिनिधी – 

थेट पालकमंत्र्यांनीच वाळू तस्करांवर कारवाई करण्याचे आदेश दिल्यानंतर महसूल प्रशासन अलर्ट मोडवर आले आहे. संगमनेर तालुक्यातील रायते शिवारात प्रवरा नदी पात्रातून बेकायदेशीर वाळू उपसा करणाऱ्या माफियांच्या विरोधात महसूल विभागाने मोठी कारवाई केली आहे. या धडक कारवाईत सुमारे २० लाख रुपये किमतीचे पोकलंड मशीन जप्त करण्यात आले असून, शासकीय कामात अडथळा आणून पळून गेलेल्या एका आरोपीविरुद्ध संगमनेर शहर पोलीस ठाण्यात गुन्हा दाखल करण्यात आला आहे.

अवैध गौण खनिज चोरी रोखण्यासाठी नेमण्यात आलेल्या विशेष पथकातील ग्राम महसूल अधिकारी अविष्कार विश्वनाथ थोरात हे १८ जानेवारी २०२६ रोजी सकाळी ८ वाजेच्या सुमारास पथकासह गस्तीवर होते. तहसीलदार मांजरे साहेब यांच्या आदेशानुसार हे पथक रायते येथील प्रवरा नदी पात्रात पोहचले. यावेळी तिथे एक पिवळ्या रंगाचे पोकलंड मशीन (चेसी नं. N604D0025) अनधिकृतपणे वाळू उपसा करताना आढळून आले. घटनास्थळी साधारण १०० ते १२५ ब्रास वाळूचा अवैध साठा पथकाला दिसून आला.

या कारवाईदरम्यान पथकाने पोकलंड मशीन जवळ उभ्या असलेल्या इसमाची विचारपूस केली असता, त्याने आपले नाव तन्वीर कबीर शेख (रा. संगमनेर) असल्याचे सांगितले. महसूल अधिकाऱ्यांनी मशीनची चावी मागितली असता, तन्वीर शेख याने चावी देण्यास नकार दिला आणि ती स्वतःकडे ठेवून शासकीय कामात अडथळा निर्माण केला. त्यानंतर आरोपीने तेथून पळ काढला असून पोलीस सध्या त्याचा शोध घेत आहेत.

याप्रकरणी अविष्कार थोरात यांनी दिलेल्या फिर्यादीवरून संगमनेर शहर पोलीस ठाण्यात एफ.आय.आर. क्रमांक ००६५/२०२६ नुसार गुन्हा नोंदवण्यात आला आहे. आरोपीविरुद्ध भारतीय न्याय संहिता २०२३ चे कलम ३०३(२), २२१ आणि पर्यावरण संरक्षण अधिनियम १९८६ चे कलम ३ व १५ अन्वये गुन्हे दाखल करण्यात आले आहेत. 

या मोहिमेत संगिता चतुरे, अनुपमा गांगुर्डे, मंगल सांगळे, मंगल डोंगरे आणि आरती साठे या महिला महसूल अधिकाऱ्यांच्या पथकाने महत्त्वाची भूमिका बजावली. पोलीस निरीक्षक समीर बारवकर यांच्या मार्गदर्शनाखाली पोलीस उपनिरीक्षक रावसाहेब लोखंडे या प्रकरणाचा पुढील तपास करत आहेत.