संगमनेरच्या नगरपालिका शाळांचा कायापालट होणार; नगराध्यक्षा डॉ. मैथिली तांबे ॲक्शन मोडमध्ये!

संगमनेर, प्रतिनिधी – 

फिनलंडमधील प्रगत शिक्षण व्यवस्थेचा सखोल अभ्यास केल्यानंतर, आता संगमनेर शहरातील नगरपालिका शाळांची गुणवत्ता सुधारण्यासाठी नगराध्यक्षा डॉ. मैथिली तांबे यांनी पुढाकार घेतला आहे. समाजातील गरजू आणि सामान्य कुटुंबातील विद्यार्थ्यांच्या शिक्षणाचा मुख्य आधार असलेल्या नगरपालिका शाळांमध्ये अमुलाग्र बदल घडवून आणण्यासाठी त्यांनी प्रत्यक्ष मैदानात उतरून शाळांच्या कामकाजाची पाहणी सुरू केली आहे. यामुळे लवकरच नगरपालिकेच्या शाळांचे रूप पालटणार असल्याचे संकेत मिळत असून शैक्षणिक क्षेत्रात या दौऱ्याची मोठी चर्चा रंगली आहे.

नगरपालिका शाळांमधून उद्याचे सक्षम नागरिक घडत असतात, मात्र बदलत्या काळानुसार या शाळांमधील पायाभूत सुविधा, स्वच्छता आणि अध्यापन पद्धतीमध्ये सुधारणा होणे अत्यंत गरजेचे आहे. हीच गरज ओळखून डॉ. मैथिली तांबे यांनी शिक्षण व क्रीडा सांस्कृतिक समितीच्या सभापती डॉ. अनुराधा सातपुते, शिक्षणाधिकारी जाहिद शेख यांच्यासोबत शहरातील विविध शाळांना भेटी दिल्या.

यामध्ये प्रामुख्याने जनता नगरमधील राजमाता जिजाऊ शाळा क्रमांक ९, अशोक चौकातील स्व. इंदिरा गांधी शाळा क्रमांक १, स्वातंत्र्य चौकातील क्रांतीज्योती सावित्रीबाई फुले शाळा क्रमांक २, चव्हाणपुरा भागातील स्व. कल्पना चावला शाळा क्रमांक ६ आणि घासबाजार येथील अहिल्यादेवी कन्या शाळा क्रमांक ४ यांचा समावेश होता.

या दौऱ्यादरम्यान डॉ. तांबे, डॉ. सातपुते यांनी केवळ औपचारिक भेट न देता प्रत्येक शाळेतील वर्गखोल्यांची स्थिती, पिण्याच्या पाण्याची सोय, स्वच्छतागृहांची अवस्था आणि उपलब्ध शैक्षणिक साहित्याची बारकाईने पाहणी केली. त्यांनी वर्गात जाऊन विद्यार्थ्यांशी संवाद साधला आणि त्यांच्या उपस्थितीचा आढावा घेतला. विशेष म्हणजे, शिक्षकांशी चर्चा करून त्यांना शिकवताना येणाऱ्या अडचणी आणि शाळांच्या विकासासाठी आवश्यक असलेल्या बाबी समजून घेतल्या. केवळ कागदावर अहवाल न मागवता प्रत्यक्ष जमिनीवर काय परिस्थिती आहे, याचा आढावा घेतल्याने प्रशासकीय यंत्रणेची चांगलीच धावपळ उडाली.

फिनलंडमधील शिक्षण पद्धतीवर भाष्य केल्यानंतर डॉ. तांबे आता स्थानिक स्तरावर त्याच दर्जाच्या सुविधा देण्यासाठी आग्रही असल्याचे या पाहणीतून दिसून आले. ज्या ठिकाणी त्रुटी आढळल्या, त्याबाबत त्यांनी संबंधित अधिकाऱ्यांना कडक शब्दांत सूचना दिल्या असून तातडीने सुधारणा करण्याचे आदेश दिले आहेत. शैक्षणिक वातावरणासोबतच शाळांची स्वच्छता आणि अत्याधुनिक तंत्रज्ञानाचा वापर यावर त्यांचा विशेष भर असणार आहे.

नगरपालिका शाळांच्या सक्षमीकरणामुळे सर्वसामान्य विद्यार्थ्यांना खासगी शाळांच्या तोडीचे शिक्षण मिळण्याचा मार्ग मोकळा झाला आहे. नगराध्यक्ष डॉ. मैथिली तांबे यांच्या या पुढाकारामुळे संगमनेरमधील प्राथमिक शिक्षणाचा दर्जा उंचावणार असून, या शाळा खऱ्या अर्थाने गुणवत्तेचे केंद्र बनतील, असा विश्वास नागरिकांमधून व्यक्त केला जात आहे.